Shillong, Jylliew 22: U MLA ba shah sospon ka Congress Bah Process T Sawkmie hynne ka sngi balang, ula kyntu ia ka Bharatiya Janata Party (BJP) ba kam dei ban shim kabu ha Jylla tang namar ba ka party ka bat ia u lakam ka jingsynshar ha Delhi.
Une u MLA ula kynthoh halor ka jingkren jong u Myntri Khynnah ka Minority Affairs u John Barla ba ong ba ka Jylla Meghalaya kam shym la lah ban pyntreikam bha ia ki skhim jong ka Sorkar Pdeng ha Jylla.
U Bah Process ula ong ba u Myntri Khynnah ula dei pynban ban iaroh ia ka Sorkar Jylla halor ka jingkloi ban leh eiei haba iadei bad ki jingjia shlei um bad jingtwa khyndew ha Jylla, kaba la wanlam ia ka jingiap jong kiba bun ki mynsiem briew bad pynjulor ia kiba bun ki jingtei.
“Ngi dang khmih lynti ba un (MoS) pynbna ia ki song jingiarap na ka Sorkar Pdeng sha ka Jylla naba ka Jylla ka donkam ia bun bah ka pisa ban tei biang ia ki jingtei bala julor, pynban ula kynthoh ia ka Jylla” ong une u MLA ka Mawlai haba pyntip ba u Myntri Rangbah ka Jylla Conrad Kongkal Sangma ula dep ban phah ia ka jingtyrwa sha ka Sorar Pdeng ba kan iarap da ka song pisa ba T. 300 klur
“Mynta kam dei ka por ban ialeh politics da kaba ong ba ka Sorkar Jylla kam shym la pyntreikam bha ia ki skhim ka Sorkar Pdeng. Ka BJP kam dei ban shim kabu tang namar ba ka dei kaba bat ia ka bor ha Delhi” ula bynrap.
