Guwahati, Naiwieng 18 :Uwei u briew la kynnoh ba ula khlad noh hadien ba ula ngat ha ka jingshah bom shnong ha ki bynta jong ka Adagudam hapoh Lal Ganesh, Guwahati.
Une u lanot ia uba la tip kyrteng kum u Sunil Sharma ula shah bom shah tied da ki dieng bad ki nar ha ki paidbah kiba don hapdeng ka jingbitar namar ka jingsuba donkti ha ki kam tuh mobile phone.
Ki khubor ki iathuh ba une u briew la kynnoh ba ula wan rung hapoh kawei ka iingsah shipor ha ka por 3 baje mynstep hadien ba ula shah kem noh ha ka kynhun jong kumba 15 haduh 17 ngut ki nongtrei bylla kiba dei ki shynrang kiba la bom la tied ia u haduh ba un da iap.
Watla na ka liang ki heh pulit kiba don ha katei ka jaka kila lah ban pyllait noh ia u na ki kti jong u paidbhur bad pynkit noh shapoh Gauhati Medical College Hospital (GMCH) na ka bynta ban aijingsumar, hynrei na ka liang ki pulit ki suba ba une u briew ula dep khlad lypa naduh ka jaka kaba ula shah thombor.
Ha kawei pat ka bynta, na ka liang ki bor pulit ka Fatasil kila kem noh ia kumba 11 ngut ki briew kiba donkti ha katei ka kam thombor bad ka jingtohkit halor kane ka jingjia kala iaid shakhmat.
Kham hashwa, kata ha u bnai Nailar ba la dep uwei u briew uba la shah suba nong rahbor khunlung ula shah bom iap ha ki paidbah hapoh ka shnong Koke kaba hapoh Jonai Rako.
Katkum ki khubor la ong ba ki trai shnong kila iohi ia une u briew uba iaid sakma ha ki bynta jong ka shnong Koke.Hynrei hadien ba kila ioh sngew ia ka jinglyniar jong kawei ka longkmie, kumta ki trai shnong kila her bran bran sha katei ka jaka bad thombor naphang ia utei u briew haduh ba un da mynsaw jur.
Na ka liang ki bor pulit ka Jonai kila wan poi mardor ha katei ka jaka bad pyllait noh ia une u briew uba la don hapdeng ka jingbym tip briew bad pynkit noh ia u shapoh Jonai Civil Hospital, hynrei na ka liang ki doktor kila pynbna ba ula dep khlad noh.
