Guwahati, Nailur 30: Ka National Investigation Agency (NIA) ka la kem ïa 8 ngut ki briew na Assam halor ka case ba ia sylla bad ka Jamaat-ul-Mujahideen Bangladesh (JMB) ban leh ia ki kam pyntriem ha ka thain Shatei Lam Mihngi.
Ka NIA kala pyntip ruh ba ka kynhun tohkit ka lap ba ka JMB ka thmu ban pyniar ïa ka lynkha treikam jong ka ha kylleng ka West Bengal bad ki jylla ba shatei lam mihngi.
Ïa kine ki jingïoh kem la leh ha ka sngi Ba-ar hadien ka jingkhynra ha ki 16 tylli ki jaka ha Assam, West Bengal bad ha Kerala.Ka NIA ka la ong ba ha ka jingtalasi la ioh ban kurup ia ki tiar digital kiba kynthup ia ki mobile phone, ki pen drive bad ki memory card.Saw ngut kiwei pat la kem na West Bengal bad uwei na Kerala bad baroh kiba la shah kem ki la poi sha ka 13 ngut.
Kane ka case ka mih na ka jingtohkit jong ki Pulit Assam ba la register ha u bnai Nohprah 2025 hadien ba la kem ïa ki 11 ngut ki briew na Assam, West Bengal bad Tripura.Ka West Bengal STF ka la register case pyrshah ïa ki 35 ngut ki nongshah kynnoh halor ka jingkynnoh ba ka don ka online Radicalization Network kaba la pynïaid lyngba ka kynhun Telegram kaba la ai kyrteng “Purya Akash”.
Hadien kata, ka NIA ka la shimti ïa ka jingtohkit bad ka la mudui chargesheet pyrshah ïa kitei ki 11 ngut kiba la shah kynnoh hakhmat ka NIA Special Court ha Guwahati ha u bnai Jylliew mynta u snem.
Katkum ka agency, ka jingtohkit jong ka, ka la lap ba kitei ki nongshah kynnoh, ki donkti ha ka buit ban pyniar ia ki kam jong u Imam Mahmud-er Kafila (IMK), ba la batai da ka NIA, kum ka tnat treikam jong ka JMB, ha West Bengal bad ha ki jylla ka thain shatei lam mihngi.
Ka agency ka la kynnoh ba katei ka network ka la kwah ban kyntiew ïa ka jingkylla niam lyngba ki jingïalang ba rieh, ki prokram hikai niam, ki kot kiba shyrkhei bad ki lad pathai khubor digital.
Ka NIA ka la ong ba ka jingtohkit jong ka ka la lap ruh ba u dkhot ba rangbah jong ka JMB u Imam Mahmud Habibullah u la seng ia ka IMK ban kyntiew ia ki kam jong katei ka seng ba la khang ha India.
Ki don 10 ngut ki nongshah kynnoh ba kynthup ia uwei u nong India bad khyndai ngut ki nong Bangladesh, ki dang phet rieh, ong ka tnad.Ka jingtohkit ka dang ïaid shakhmat.
Ki jingkynnoh ki dei shi bynta jong ka jingtohkit kaba dang iaid shakhmat bad ki nongshah kynnoh ki dang hap ban shah rai pynrem ha ka iingbishar.
