Shillong, Nailur 30 : Ka Meghalaya kala pynthymmai ia ka jingiatehlok bad ka UN World Food Programme ban pynkhlain ia ki kam halor ka jingdon pahuh ka marbam, ki jingbam tei met bad ka jingpynkylla ha ka PDS, da ka jingpynkylla ia ka soskular bala iasoi ha Delhi ha ka sngi Balang.
U Myntri ka Food, Civil Supplies and Consumer Affairs Bah Methodious Dkhar ula iadonlang ha ka por ba iasoi ia ka amendment hapoh ka head office ka WFP India.
U Commissioner & Secretary, Food Civil Supplies, Pravin Bakshi ula soi ia ka soskular na ka bynta ka Sorkar Meghalaya katba ka Nongmihkhmat ka WPF ha India bad Country Director Elisabeth Faure kala soi na ka bynta ka WFP.
Ia ka Jylla la mihkhmat da ka Director FCSCA I Mawlong, Under Secretary B Syiemlieh bad OSD S K War, katba u Ankit Sood bad Rodrick John kila mihkhmat na ka WFP.
Kine ki arliang mamla kila iatreilang naduh u snem 2022 halor ka jingpynkhlain ia ka PDS, ka jingpyn khlain ia ka jingpynpoi marbam, jingpyniaid ia ki kam da ki kor digital bad kiwei kiwei.
“Kane ka jingpynthymmai ia ka jingiatehlok kan nang pynkhlain ia ka jingiatreilang, sei ia ki buit thymmai, bad pynkhlain ia ka jingpoi ki marbam ha Meghalaya, synniang sha ka jingpyrshang jong ka Jylla ban kynjoh ia ka Sustainable Development Goal 2-Zero Hunger” ong ka Sorkar.
