Agartala, Naiwieng 18 :Da kaba kam ba ka seng Congress bad ka CPIM kim don ia ka lawei, na ka liang u Myntri Rangbah (CM) barim ka Tripura u Biplab Kumar Deb ula ong ba dei tang ka BJP marwei ka party kaba don hapoh ka ri.
Ia kane une u CM barim ula pynpaw haba kren sha ki lad pathai khubor ha ka ‘National Press Day-2022’ hapoh ka iingsah sorkar jong u.U Deb uba dei ruh u MP ka Rajya Sabha ula kam ba ha u snem 2018 ka CPIM kala shah rem noh ha ka ilekshon namar kim shym la shim ba ka jingiathep vote ka dei kaba shem jingeh.
“Na ka bynta ka BJP barabor ngi iohi ba ka ilekshon kum ka kam kaba khia bad kaba eh shibun, hynrei ka CPIM baraboh ka shim ba ka dei ka kam kaba suk kumta kala shah rem noh ha ka ilekshon assembly ha u 2018,” ong u Deb.
Nalor kata u Deb ula ong ruh ba lait na ka BJP mynta ym don kiwei pat ki party ki ban dang don hapoh ka ri.
“Kaei ka bynta jong ka Sonia Gandhi, Rahul Gandhi, bad u Priyanka Gandhi ha ka por ba la pynlong ia ka ilekshon ha Himachal Pradesh? Kim don satia ia kano kano ka bynta.Hapoh ka Congress ym don shuh ki nongialam kiban leit ialap na ka bynta ka party.Ka ‘Bharat Jodo Yatra’ ne ka jingiaid paidbah kala wanrah ka jingduh nong ia ka Congress bad kan ym pynioh nong satia ia ka party.Ha Kerala, lada ka Muslim League kan weng ia ka jingkyrshan jong ka, kumta ruh ka CPIM kala jah kyrteng.Ka CPIM bad ka Congress kim don paralok,” ong shuh shuh u Deb.
Nalor kata u Deb ula kam ruh ba ha u snem 2018, ki paidbah nongshong shnong ka Tripura kila pynwan ia ka BJP ha ka bor khnang ban ioh ia ka jinglaitluid na ka jingsynshar ba thurmur jong ka CPIM.
“Nga la leit ban kurup ia ki thain nongkyndong ha Tripura.Ki paidbah ki lah ban ym sngewtynnad ia ki nongialam jong ka party hapoh ka thain, hynrei kin kyrshan bad vote ia ka BJP,” ong u Deb uba la bynrap ruh ba ha kane ka ilekshon 2023 ki paidbah kin ai ka jingkyrshan ia ka BJP na ka bynta ka lawei ba phyrnai bad na ka bynta ka roi ka par.
“Kaei ka jingthmu jong ka CPIM? Hato ki don kano kano ka plan? Hynrei, nga la don ia ka plan na ka bynta 25 snem.Ha India ym don da kiwei pat ki party lait noh na ka seng BJP,” bynrap shuh shuh u CM barim ka Tripura.
