Imphal, Naiwieng 15: Ia ka tamasa Amur Falcon ha ka sien kaba hynniew la rakhe hapoh Tamenglong district ka Manipur hynnin ka sngi Nyngkong lyngba ki program bapher bapher.
Ia kane ka tamasa la pyniaid da ka tnat forest ka Manipur da ka jingthmu ban pynshai paidbah halor ka jingdonkam ban aijingiada bad pynneh pynsah ia kine ki sim Amur Falcon, kiba dei ki jait sim kiba lah ban her jngai tam ha ka pyrthei bad kiba ju her kynhun na kawei ka jaka sha kawei pat.
La pynlong ia kane ka tamasa ban pynkhlain ia ka jingiadei hapdeng ki briew bad ka mei mariang bad ruh ban pynpaw halor ka jingdonkam ban pynneh pynsah ia kine ki jingthaw ba her hapdeng ki paidbah nongshong shnong jong ka thain.
U myntri ka tnat Forest, environment and climate change, u Thongam Biswajit Singh, u Myntei ka tnat water resources u Awangbow Newmai bad u principal chief conservator of forest ideasu AK Joshi kila wan iashim bynta lang ha kane kane ka tamasa.
Kine ki sim Amur Falcon barabor ki ju wan poi da ka kynhun bah ha u bnai Risaw ha Nagaland bad Manipur bad mih noh ha u bnai Naiwieng hadien ba kila pynkdang ia lade na na ka bynta kawei pat ka jingiaid lynti kaba jngai sha Africa, ong u Myntri Thongam Biswajit Singh.
Na ka liang u DFO ka Tamenglong forest division u Amandeep ula ong ba kane ka tamasa kam dei tang ka jaka ban ialehkmen hynrei ka dei ruh ka jaka ha kana ki briew na ki kynhun bapher bapher ki wan ryngkat lang bad iasam lem ia ki jingai jingmut.
Nalor kata ula ong ruh ba ka jingpynlong ia kane ka tamasa kam dei tang ban kyntiew bad pynshlur ia baroh ki kynhun kiba ia don bynta ha ka ban aijingiada ia kine ki jait jingthaw hynrei ban pynrung ruh ha ki jingmut jingpyrkhat jong kane ka juk ba mynta ban don ka jingsngew ieit shaphang kine ki sim Amur falcon bad kiwei pat ki jait mrad khlaw bad ki sim ki doh.
