Agartala, Naiwieng 15: Ki bor pulit ka Irani kila kem noh ia uwei u khynnah halor ka jingkynnoh donkti ha kaba pyniap ia uwei u para khynnah uba dang 13 snem rta, ha kaba ia ka metiap jong u la lapdien na ka ja ka khlaw ha Kailashahar ha ki bynta ka North Tripura district lai sngi hadien ba ula jah rngai.
Utei u khynnah uba la shah kynnoh donkti 16 snem rta la kynnoh ba ula ksih iap ia utei u khynnah hapoh ka ja ka khlaw, ong u heh pulit.
Ki pulit kila ong ruh ba utei uba la shah kynnoh donkti u dei u para marjan jong utei u lanot na ka shnong Khawrabil kaba hap hapoh Irani police station.
Ki pulit ki iathuh ba utei u khynnah 13 snem ula jah rngai noh khyndiat por hadien ba ula mih na la iing ha kane ka janmiet sngi Thohdieng ba la lah, bad naduh katei ka sngi na ka liang kiba haiing hasem ha ryngkat ki nongshong shnong kila pynlong ka jingwad paidbah na ka bynta une u khynnah uba jah rngai.
Na ka liang u hymmen jong utei u lanot ruh ula leit ban ujor sha ki bor pulit ka Irani police station.“ Ki trai shnong kila ong hadien ba ula mih na la iing ha katei ka janmiet sngi Thohdieng ba la lah, na ka liang ki nongshong shnong kila iohi ruh ia ar ngut kiwei pat ki khynnah kiba dei na kajuh ka shnong ha ryngkat bad u.
Ha ka janmiet sngi U Blei ba la lah, na ka liang ki nongshong shnong kila khot ia kitei ki arngut ki khynnah ban kylli shaphang utei u khynnah uba jah rngai.
Haba la bteng ban kylli, kine ki arngut ki khynnah kila iathuh ba kila iohi ia ka met jong u hajan ka jaka khlaw. Kumta ruh da ka jingphla ka jong ki na ka liang ki nongshong shnong kila leit sha katei ka khlaw bad iohi ia ka met jong utei u khynnah, ong u heh pulit.
Hadien ba la ioh jingtip, ka kynhun ki pulit kila wan poi mardor ha katei ka jaka bad pyllait ia kitei ki arngut ki khynnah na u paidbhur kiba la sdang ban thombor ia ki bad ialam noh ia ki shapoh Irani police station.“ Ha ka jingtohkit uwei na kine ki khynnah ula phla ba ula ksih iap ia utei u khynnah ha katei ka khlaw. “ Na ka liang ki pulit kila rejistar case bad kem noh ia utei u khynnah.
