Nongpoh, Naiwieng 14: Ha kawei ka jingjia mynta ka sngi, saw ngut ki nongtrei ka National Highway Authority of India (NHAI) ki la mynsaw hadien ba uwei u diengbah u la khyllem kynsan ha u surok bah National Highway 6 kaba don hapdeng ka shnong Umling bad Shangbangla.
Kat kum ki jingtip, kane ka jingkhyllem kynsan utei u diengbah ka la jia ha ka por kumba 2 baje eiei nohphai sngi katba kitei ki nongtrei ka NHAI ki dang shong harud surok.
Ia kine ki saw ngut ki ki ba la mynsaw la pynkit noh mar mar sha Nongpoh Civil Hospital na ka bynta ban ioh ia ka jingsumar katba uwei pat uba la kham mynsaw jur la pynkit noh sha ka jaka ai jingsumar sha ka nongbah Shillong.
La iathuh ruh ba ha kane ka jingjia, ym shym la don satia ki kali kiba julor ne shah shah ban lait tang ka jingmynsaw jong ki nongtrei ka NHAI.
Na ka liang ki katto katne ki ‘riew paidbah kiba la sakhi ia katei ka jingjia, ki la kyntu ia ki bor ba dei khmih jong ka tnad Forest ba kidei ban shimkhia na ka bynta ban pom noh ia baroh ki diengbah kiba don ha shilynter u surok bah kiba buh jingma ia ka leit ka wan jong ki paidbah khnang ban lait na kino kino ki jingjia ba sngewsih hadien habud.
