Shillong, Naiwieng 12 : Ka Arunachal Pradesh kala pynkut syndon ia ka Meghalaya na ka lympung iakhun jong ka U-17 Women’s Football ka 2nd North East Olympic Games 2022 hynne ka sngi saitjain da ka jingpynliem haduh 3-1 kol ha madan MFA Turf, Polo.
Kawei pat ka jingiakhun kala poi sha ka jingiashut penalty ban rai ia ka nongjop hapdeng ka Sikkim bad ka Assam hadien ba kila iakhaid ba 1 kol hadien ka 90 minit. Ka Sikkim kala jop da 3-0 kol ha ka tiebreaker.
Kane ka jingiashut tiebreaker kala mih namar baroh kine ki kynhun ialehkai ki long mar katjuh ha ka jingiapher ka jingioh thep kol bad shah thep kol hadien ba kila shah rem ha ka Manipur mar 6-0 kol. Da kine ki jingjop ka Manipur kala ioh rung sha ka semi phainal jong ka group 1.
Ha ka jingialehkai jong ka Group 2, ka Arunachal kala tam shakhmat da ka jingioh thep kol ha ka minit ba 2 lyngba ka Kai Rumi. Ka Meghalaya kala lait ia ka penalty bad ka Arunachal Pradesh kala ioh ban thep biang ia ka kol kaba ar da ka Angel Tawang ha ka minit ba 22.
Ka Gunai Taisik kala ioh ban thep ia ka kok b alai ha ka 54 minit kaba lah pynkut lad syndon ia ka kynhun ialehkai ka Jylla watla kala ioh ban thep ia shikol lyngba ka Makrisha Songthiang.
Ka Meghalaya ka hap ban jop ia kane ka jingiakhun da ka jingshah rem ha ka jingiakhun ba nyngkong pyrshah ia ka Mizoram kaba long da 4-2 kol. Ka Arunachal Pradesh kala pynliem ia ka Mizoram da 3-1 kol bad ka jingjop ba mynta ka mut ba kala wan hakhlieh duh jong ka Group 2 bad ka Mizoram kala wan ba-ar ban ioh rung sha ka semi phainal.
Ka jingiakhun semi phainal jong ki kynthei kan long ha ka sngi nyngkong ha kaba ka jingiakhun ba nyngkong kan long hapdeng ka Manipur bad ka Mizoram ha ka por 11 baje mynstep bad sa pynbud da ka jingiakhun hapdeng ka Arunachal bad ka Sikkim ha ka por 4:30 baje janmiet.
Lashai ka sngi, kan don ka jingialehkai semi phainal jong ka U-21 ki shynrang ha kaba ka jingiakhun ba nyngkong kan long hapdeng ka Mizoram pyrshah ia ka Nagaland ha ka por 11 baje mynstep bad ka Meghalaya pyrshah ia ka Manipur ha ka por 4:30 baje janmiet.
