Nongstoiñ, Naiwieng 12: Ki riew rangbah ka thaiñ Rambrai kiba kynthoh jur ia ka seng Hynniewtrep Youth Council (HYC) halor ka jingmih ban pynwit bad pynthut ia ka jingwan jong u Myntri Rangbah ka Jylla Conrad K Sangma ha ka 9 tarik Naiwieng ban plie ia ka Rambrai Community & Rural Development (C&D) Block.
Kine ki riew rangbah ba kynthup ia u Bah Kwikly Marngar Sordar ka shnong Rambrai, bah Amishan Nongshilong bad kiwei kiwei kiba dei ki dkhot jong ka Dorbar, ki la pynpaw ïa ka jingbynñiaw bad ka jingsngewsih kaba jur eh ba ki samla na ka seng HYC kila shim ia kane ka sienjam ha kum kane ka sngi kaba dei ka sngi ba khraw jong ka dong ka thain.
U Sordar haba iakren bad u nongthoh khubor ula ong “Da ki phew phew snem ngi la thrang dik dik bad ap khmih lynti ïa ka roi ka par ha kane ka thaiñ. Nalor nangta ym pat ju don kiwei pat ki Myntri Sorkar jylla Meghalaya kiba la wan ban ïuh kjat ha ka thaiñ mynno mynno ruh, khamtam ban wan ai ïa kum kane ka jingmyntoi na ka bynta u paidbah. Pynban dei tang une hi u Myntri Rangbah u ba la wan kaba la long ruh ka sien kaba nyngkong ba ngan ïohi ha ka jingim jong nga”.
“Hynrei ki samla ki la wan ban pyrshang pynwit ban long mawjynthud ïa ka roi ka par. Kumta ngi da lei lei ngim lah ban pdiang ïa kum kane bad ngi kyntu ruh ïa ki samla ba kin da kynmaw, ba lada khlem ka jingïatreilang bad ki bor shnong, to tip ba ki jingïakhih jong phi haba ïadei bad kino kino ki mat kiba phi ïakhih phin ym poi sha ka thong bad kan ym long ruh kaba bha”, ong u bah Kwikly Marngar Sordar ka shnong Rambrai.
U la ong, “Tang ka rukom kren jong ki samla ha ki lad pathai khubor ruh ngi ithuh shai ba ki dei tang kiba la shu leh shongshit ym kiba leh shit rhem. Kano kano ka kam kaba la shu leh shongshit ka pynap jingma ym tang ïa uwei hynrei ïa baroh lang, kumta ki samla ki dei ban long rangbah ym kum ki khynnah”.
