Nongstoiñ, Naiwieng 12: Kumba mar shiteng na ki khynnah nongkyndong ha West Khasi Hills haduh kine ki sngi, ki dang im bad pynlut їa ka por jong ki ha ki lum ba jyrngam bad ki pyntha phlang ryngkat ki masi ki blang khlem jingkhuslai. Ha ka jinglong ba shisur, ka jingim jong ki ka dei ka jingim kaba sngewtynnad tam na ki por baroh.
Ha kine ki sngi ha ka jingjurip jong Ka Shlem ia ka jinglong jingman jong ki nongshong shnong ha ki nongkyndong, la lap ba palat mar shiteng na ki shnong hapoh ka District ki dang ialeh ban pynneh pynsah їa ka kam ri jingri kum ki masi, ki blang, ki syiar bad ki sniang na ka bynta ban kyrshan їa ki їing ki sem bad ban kyntiew їa ka їoh ka kot.
La lap ruh ba ha ki nongkyndong, ka jingmyntoi ba ki їoh na ki jingri kum ki masi ki blang bad ki sniang, kam dei satia tang ka jingpynmih pisa hynrei ka eit kaba ki pynkylla sboh ban thung bad ban rep ban riang ka dei kaba kongsan tam.
Haba twad jingmut, kiba bun ki Nongshongshnong ki la їathuh ba ki Khun ki Kti jong kiba bun hi ki Longiing ki dei kiba nang lut ban ri ban sumer ia ki jingri jingduk kum ki masi ki blang bad ki dei ki nongsharai kiba tbit bad ba tip bha iala ki jong ki jingri.
Kila ong, ki khun kiba dang hapoh 14 snem ki dei ki nong sumar ban ri bad ban ap їa ki ha ka por mynsngi. Nalor
Kiba bun ki Longiing ki dei kiba iabeh ia ka jingnang jingstad bad ki da thrang dik dik ban pynnang pynstad ia ki khun bad ym don ruh kawei ka Longiing ka bym phah leit skul iala ki khun.
Kila ong ba ba jan 100 na ka shispah ki khynnah ki dei kiba leit skul mynstep ha ki jaka nongkyndong bad mynsngi pat ki im sha ki lum bad ki pyntha phlang ban sharia iala ki jongri.
Ki la ong ruh ba watla ki khun ki kti jong ki, ki dei kiba im bad ki jingri jingdup ruh, hynrei yn da ki la poi sha ki klass kiba kham shaneng kim dei satia kiba duna ha ka jingpule bad ki don ruh shibun ki khynnah kiba ia ryngkat ka jingnang jingstad bad kiwei pat ki khynnah kiba im ha ki jaka sor.
Kawei ka longkmie ka la ong ba wat la ki khun jong ka ki im ban sharai masi shalum hapdeng ka jingshit kyrang jong ka sngi ha ka por pyrem bad ka jingther jong u slap ha ka por lyiur ruh, kim ju їoh pang wat shisien ruh. Ha baroh shi aїom bad ha ka por janmiet mar shu dep set їa ki masi ha sem, ki minot thop ban khreh kot kumba la bthah da ki nonghikai.
Ka la pynpaw ruh ba ka sngew sarong ba ki khun jong ka, ki im ki san ha ryngkat ka jingsain dur ka mariang. Ka la ong ruh ba ynda ki la heh la san bad ki la pyndep їa ka jingpule jong ki, kin sa ngewthuh kumno ban ñiewkor їa ka jingkordor jong ka mariang bad ka jin donkam ban pynneh pynsah kumba ka long.
