Shillong, Naiwieng 11: U Myntri ka tnat pynroi sor bah Sniawbhalang Dhar hynne ka sngi thohdieng, u la pynbna ba ka National People’s Party (NPP) kala don lypa 58 ngut ki kyrtong ban iakhun haka ilekshon 2022.
U bah Sniawbhalang u la pyntip ia kane haba kren ha ka jingialang jong ka NPP Nartiang Block Committee kaba la long ha Iaw Pynsiñ, Wahiajer haka ba da ki hajar ngut ki nongkyrshan ki la wan ban shim bynta haka jingdon lang ruh u Myntri ka tnat PWD (Buidling) u bah Dasakhiatbha Lamare, u MLA ka Jowai u bah Wailadmiki Shylla, u CEM ka JHADC u bah Thombor Shiwat, ki MDC lem bad kiwei kiwei de.
Ia kane ka jingialang jong ka NPP Nartiang Block ha Wahiajer la pyniaid da u bah Hamkom Khynriam u badei ruh u president ka NPP Nartiang BC bad u bah Sanwotki Laloo u badei ruh u waheh Chnong ka shnong Wahiajer.
U bah Sniawbhalang Dhar u la ai khublei ia u Myntri Rangbah ka jylla u Conrad K Sangma u la mang tyngka naka bynta ban kyntiew iaka roi ka par hapoh ka thain Nartiang konstitwensi.
U bah Sniawbhalang u la ong ba hashuwa ka sorkar MDA, ka jylla Meghalaya ka don tang 400 tylli ki SHGs hynrei mynta ka kynti kila don palat 45000 tylli ki SHGs kiba trei naka bynta ban kyntiew iaka ioh ka kot ha ki thain nongkyndong.
U la ong ba katba dang mih ki sngi ka NPP ka dang kiew bad ka dang khlain bad kane kadei namar ka jingiathylli ki nongialam ka party bad kumjuh ruh ki dkhot bad ki nongtrei kiba trei shimtom ban nang pynkhlain shuh shuh iaka party.
Naka liang u bah Ngaitlang Dhar u la ong ba ki paidbah ki kam ba ka ïng ka sem jong nga long kaba riew spah hynrei kim tip ba ka longïng jong ki Dhar ka long ruh kaba riew spah haka mynsiem ban iarap iaki paidbah namar ka jingkyrkhu ba ioh na u Blei.
Naka liang u MLA ka Jowai u bah Wailadmiki Shylla u la ong ba iaka NPP la seng ha u snem 2012 hynrei lada peit mynta ka kynti ka NPP kadei ka party kaba khlain bha kaba la ioh jingithuh ruh ha kylleng ka ri India khamtam hapoh ka thain Lam Mihngi bad dei namar kane ka NPP ka don ruh iala ki MLA ha kiwei ki jylla.
Kiwei kiba kren ha kane ka jingialang paidbah ki kynthup u MDC ka Ummulong Moodymmai u bah Jesse Suiam, u Waheh Shnong Namdong u bah Damian War, u nongaiktien ka NPYF u bah Bajop Pyngrope lem bad kiwei kiwei de.
