Shillong, Naiwieng 9: Ki kynhun kiba la rung sha ka U-21 men’s football ha ka 2nd North East Olympic Games, 2022 kila thikna mynta ka sngi da ka jingjop jong ka Meghalaya, Mizoram bad ka Nagaland.
Ha ka jingialehkai ba mynstep, ka Meghalaya kala pynliem ia ka Arunachal Pradesh da 6-0 kol jong ka Group 2 ha MFA Turf, Third Ground Polo.
Ka Kynhun ialehkai ka Meghalaya kala ioh thep lai kol ha ka kylla step bad lai kol ha ka kylla miet bad ia kine ki kol ka thep da u samla Everbrightson Mylliempdah (8’), Figo Syndai (39’, 62’), Damonlang Pathaw (41’). Dajiedlang Wanshnong (57’) bad Nelson Rymbai (79’).
Ka Mizoram kaba ialehkai ia ka jingiakhun ba nyngkong ha ka Group 1 pyrshah ia ka Assam hynne ka sngi, kala ioh khur ia ka jingjop da 6-0 kol bad u samla Joseph Lalvenhima ula ioh hattrick da ka jinglah ban thep kol ha ka minit ba 18’ kaba dei ka penalty, 25’ bad 37’bad kaba saw ha ka minit ba 62. Ia ki arkol kiwei pat la thep da u K Lalrosanga (47’) bad Rohlupuia (51’).
Ka Assam kaba la shah rem ha ka jingialehkai ba nyngkong pyrshah ia ka Manipur, kala duh noh ia ka lad ban rung sha ka semi phainak.
Na ka Group 1, ka Mizoram bad ka Manipur kila ioh ban rung sha ka semi phainal na kane ka group hynrei ia ka kynhun ba hakhmat eh ne ka kyrdan ba nyngkong bad ba-ar yn sa lah ban tip ynda kine ki kynhun kila iakynduh para maki ha madan iakhun ka ban long ha ka sngi thohdieng.
Ha ka jingiakhun ba khatduh jong ka sngi, ka Nagaland kala ioh ia ka jaka ba khatduh ha ka semi phainal da ka jingjop ba 4-0 kol pyrshah ia ka Sikkim. Ia kine ki kol la ioh thep da u Yhoto Lohe (19′), Thulunso (35′) , Hivika (55′) bad Pursunep (88′).
Namar ka jingshah rem ha ka Meghalaya da 6-1 kol ha ka sngi nyngkong, ka Sikkim lem bad ka Arunachal Pradesh kila hap ban leit phai iing noh.
Lashai ka sngi, ha ka jingialehkai jong ka U-17 Women Division, ka Arunachal Pradesh kan iakhun pyrshah ia ka Mizoram ha ka group 2 bad ka Sikkim kan iakhun pyrshah ia ka Manipur ha ka Group 1. Kine ki jingiakhun kin long ha ka por 11 baje mynstep bad 3:30 baje janmiet.
