Tura, Naiwieng 08 : Ka sorkar Meghalaya Democratic Alliance (MDA) kala rai ban kyntiew kyrdan noh ia ka Rongjeng kum ka Civil Sub-Division bad ia kane ka rai yn sa leit pynbna da u Myntri Rangbah ka Jylla Conrad K sangma ha ka 11 tarik Naiwieng ban plie syndon ia ka.
Ka Rongjeng ha East Garo Hills kan dei ka Civil Sub Division ba nyngkong eh jong ka District bad kaba saw ha Ri-lum Garo.
Kane ka Sub Division kan dei kaba khatduh hadien ka Chokpot ha South Garo Hills bad ka Raksamgre ha West Garo Hills. Ka Sub Division kaba la rim tam ha Ri-lum Garo ka dei ka Dadenggre, West Garo Hills kaba la treikam mynta la palat 40 snem. La plie ia ka ha ka 17 tarik Nailar, 1982.
Ka rai ban ai Sub Division ia ka Rongjeng ka dei ka jingdawa kaba la slem bha bad ka NPP kaba la shimti ia ka bor ha u snem 2018, kala kular ia ki paidbah ka thain ba kan khmih bad ban shimkhia ia kane ka jingdawa.
Kan dei ruh ka kam radbah jong u Myntri Rangbah ka Jylla Conrad K Sangma hadien baka NPP kala jop haduh 5 na ka 6 tylli ki Constituency bad kala ioh ruh ban bat ia ka Rongjeng bad Williamnagar ha East Garo Hills, Kharkutta, Resubelpara bad Bajengdoba ha North Garo Hills.
Tang ka Songsak kaba la shah rem ha u Myntri Rangbah barim Dr Mukul Sangma uba la jop kum u kyrtong ka Congresss ban khanglad ia ka NPP ban ioh sar lut naphang ia ka East Garo Hills.
Ka Rongjeng ka kynthup ia ka Dambu-Rongjeng Community & Rural Development Block kaba don 15 tylli ki gram sevak circle. Ka don haduh 189 tylli ki Shnong hapoh kane ka Block bad ka jingdon ki nongthep vote kat kum ka khana samari 2011 ka long 29,519 ngut.
Ka Rongjeng ka dei ka lynti iaid na Ri-lum Garo ba pyniasoh bad ka Ri-lum Khasi lem bad ka Jylla Assam. Ka surok National Highway ba pyniasoh ia ka Shillong bad Tura lyngba ka Nongstoin, ka dei kaba iaid lyngba ka sor Rongjeng.
