Wat ki bahaiing ki dang kyrshan ia ka UDP
Nongpoh, Naiwieng 07: Ki nongialam ka United Democratic Party (UDP), Umsning Circle hynne ka sngi nyngkong, ki la mih shakhmat ban pynshai ba ka jingmih noh jong u MDC barim u ba dei ruh u President barim ka party Bah Donkupar Sumer kan nym don jingktah eiei ia ka party namar ka dei tang ka jingmih jong u bad katto katne ngut ym kumba la pynmih ha ki lad pathai khubor.
Ia kane la kynthoh da ki nongialam ka UDP, Umsning Circle kiba kynthup naduh u Bah Rocky Kylla, Vice President, u Bah Eddie G Kharbani, ka Kong R. Kharlukhi, President Women Wing bad ka Kong Ristila Nongbri, Working President ka Women Wing.
Kine ki nongialam ki la pynpaw shai ba kane ka jingmih jong u Bah Donkupar Sumer lem bad katto katne ngut kam ktah da leilei ia ka party namar ba kum ka party hi ka dang skhem bha bad nang iai khlain na kawei ka sngi sha kawei pat bad ka jingkam ba da ki spah ngut ki la mih lang bad u Bah Sumer ka long ka bym dei shisha.
Kine ki nongialam ki la iathuh ruh, ba ha ka 5 tarik u Naiwieng u Bah Donkupar Sumer u la khot ia ka jingialang ia kito ki nongkyrshan kiba ju kyrshan ia u mynta la bun bun snem ha ki ileksion ba la dep, ha kaba da ki spah ngut ki la leit ban sngap ia katei ka jingialang hynrei kaba la pynkyndit pat ia kitei ka long ba une u MDC barim u la shu rai ban mih noh na ka party khlem ka jingiasyllok bad ki, ha kaba la tip shai ba kitei ki nongkyrshan kiba la leit sha katei ka jingialang ki dang neh bad skhem hi bad ka UDP.
Ka Kong R. Kharlukhi bad ka Kong Ristila Nongbri kiba dei ki nongialam na ka Women Wing ka Umsning Circle, ki la pynshai ba ma ki ruh ki la leit ban shimbynta ha ka jingialang kaba la khot da u Bah Donkupar Sumer ban sngap ia kaei kaba u don ban ong, namar baroh shikatta ki dei kiba la ai ka jingkyrshan kaba radbah ia u ha ki ileksion ba la dep bad kim shem la don pat ia kata ka jingmut ban mih noh na ka party UDP kumba la pynbna ha katei ka jingialang kaba la long ha ka 5 tarik u Naiwieng hynrei ki dei kiba dang treishitrhem na ka bynta ka party na ka bynta ka ileksion MLA 2023.
Ki la pynpaw ruh ba kum ki nongtrei bad ki nongkyrshan jong u Bah Donkupar naduh ki por ba la dep, ki dap da ka jingsngewkmen ba dang shen ha ki Lad Pathai Khubor u Bah Donkupar Sumer u la pynbna ban iatreilang beit bad ka party wat lada um nym ioh ia ka tiket ban iakhun ia ka ileksion MLA 2023 hynrei kaba la pyniuh tdong bsein pat ia ki ka long ka jingpynbna jong u ban mih noh syndet syndet na kane ka party UDP ha ryngkat bad ki nongkyrshan jong u.
Kine ki nongialam ka UDP Umsning Circle ki la pynshai ba wat ki bahaiing hasem jong u Bah Donkupar Sumer kiba la leit ban don bynta lang ha katei ka jingialang kaba la long ha ka 5 tarik u Naiwieng ki la pynpaw shai ba ka jingmih jong u Bah Donkupar ka dei ka rai shimet jong u, hynrei kum ki bahaiing ne ki hymmen ki para ki dang neh bad ka UDP bad kin nang ai ka jingkyrshan kaba radbah ia kane ka party ha ka ileksion MLA 2023 ban kyrshan ruh ia u kyrtong ban pynbna da kane ka party.
