Nongpoh, Naiwieng 07: Ban kynmaw burom ïa ka sngi ba la seng ïa ka kynhun ki Bharat Scout and Guide (Foundation Day), mynta ka sngi ka kynhun jong ka Bharat Scout and Guide ka St. Paul Higher Secondary School, Nongpoh ki la rakhe ïa kane ka sngi da kaba pynlong ïa ka jingpynkhuid ïa ka sor Nongpoh baroh kawei naduh na Nongpoh Police Station terter sha ki jaka ïeng kali paidbah ha sor Nongpoh.
Ha kane ka jingrakhe, la sakhi ïa ki khynnah skul kiba dei ki scout and guide ki la shim ïa ka bynta ban pynphriang ïa ka khubor halor ka jingkordor jong ka jingkhuid jingsuba bad ba ki paidbah kin shim ia ka jingkitkhlieh ban sumar ïa ka mei mariang.
Ka nongïalam jong kane ka kynhun, ka la pynpaw ïa ka jingkmen kaba khraw ban rakhe ïa kane ka sngi da kaba shimbynta ban pynkhuid ïa ka sor Nongpoh ha kaba ki khynnah ki la tam ïa ki nuit ki nier bad ban lum ban lang ïa ki ha ki jaka theh niut kiba don ha sor Nongpoh.
Ka la ong ruh, ba kane ka dei ka sienjam ban pynbna paidbah halor ka jingdonkam ban long kiba leh khuid bad ban kiar na ka jingbret pathar ïa ki jakhlia ha ki lynti ki synkien khamtam ki tiar plastic kiba long ka jingma kaba khraw ïa ka mei mariang bad ki sawdong sawkun jong ka, da ka ïa wer ruh ïa ki paidbah ba kin long kiba don ïa ka jingkitkhlieh ban ri sumar ïa ka mei mariang.
