Nongpoh, Naiwieng 05: Ka seng riewlum United Democratic Party (UDP) Umsning Circle ka la mad ia ka jingtynjuh kaba khraw sha ka elekshon MLA-2023 da ka jingmih noh u Working Presdident uba dei ruh u MDC barim ka Party Bah Donkupar Sumer lem bad ki nongkyrshan namar ka jingshah pynduh ticket ha ka party.
Ki Nongialam bad ki nongkyrshan kiba don ha syndah une u MDC barim kila rai ban mih noh na kane ka seng riewlum ban nym iadon bynta bad ka ha ka elekshon MLA ban wan.
Ïa kane ka rai ban mih noh na ka UDP la shim ha ka jingïalang paidbah kaba la long ha Umsning Auditorium ha kaba u Bah Donkupar Sumer kum u nongïalam ka party u la shim ruh ïa ka rai ban nym aireng ha kane ka ileksion MLA kaban sa wan hynrei un aireng pat ha ka ileksion MDC ha u snem 2024, hynrei ïa ka rai ban leit ai jingkyrshan ïa kiwei pat ki kyrtong ne ki kynhun ym shem la pynbna shwa.
Haba kren ha ka jingïalang, u Bah Donkupar Sumer lem bad kiwei kiwei ki nongïalam ki la pynpaw, ba ki la shim ïa kane ka rai ban mih noh na kane ka seng riewlum hadien ba ki la dep ai ka jingkyrshan kaba da ki phew snem ka long tang namar ka jingleh bym suidñiew bad bym burom lem da ki nongïalam ki halor jong ka party khamtam eh halor ka jingbym sngap ne burom ruh wat ïa ka sur jong ki paid nongkyrshan jong ka.
Ki la pynpaw ruh, ba ka la don ka jingkren bad jingpynbeit kaba sopsop hapdeng ki nongïalam kiba halor ka party kynthup naduh ka state level halor ka rai ban pynbna ïa ka tiket ban ïakhun ïa ka ileksion MLA 2023 ha Umsning Konstituensi ban ai sha u kyrtong u ba dang shu pynïasoh shen bad u bym don kano kano ka jingnoh synñiang ïa ka party ne wat ïa ki paidbah hynrei la shu mon ïa u ne u kyrtong tang namar ka spah kaba u don.
Na ka liang u Bah Donkupar Sumer, u la pynpaw ïa ka jingdiaw kaba khraw halor ka jinglong jingman hapoh ka party UDP khamtam ka jingbym don jingkitkhlieh da ki nongïalam ka party khlem da kheiñ shuh ïa ki jingshakri jong u lem bad kiwei kiwei ki nongïalam ba hakhmat khamtam ruh jong ki nongkyrshan ka party.
Ula ong ba jingtmang halor kine baroh, ki nongïalam ka Umsning Circle hi baroh kawei ki la rai ban mih noh na kane ka party bad kin sa shim ïa ka rai shano bad ïano kin ai ka jingkyrshan ha kane ka ileksion MLA ha u snem 2023.
Shuh shuh ruh, na ka liang u Bah Donkupar Sumer kum u Working President barim ka party bad u MDC barim, u la rai ruh ban nym aireng ha kane ka ileksion MLA ha u snem ban wan hynrei un nang pynkhreh pat ban mih aireng ha ka ileksion MDC 2024 na ka bynta ban nang pyntyllun ïaki kam shakri paidbah.
