Nongpoh, Naiwieng 04: U Myntri ka Sorkar Pdeng ba khmih ia ka Jal Shakti u Gajendra Singh Shekhawat, hynne ka sngi Thohdieng, ula lum ia ka jingialang bad ki Ophisar ka Ri-Bhoi District ban shong bishar kam halor ka jingpyntreikam ia ki skhim bapher bapher bala pynmang da ka Sorkar Pdeng kum kawei na ki Aspirational District.
U Myntri ula lum ia kane ka jingialang ha Nongpoh kaba la wan iashimbynta lang da u Deputy Commissioner Arpit Upadhyay, u Syed Md.Andaleeb Razi, IRTS, Commissioner & Secretary Forest Environment, AH&Vety Dept, u Joram Beda, IAS Member Secy SCSTE, u Giri Prasad IPS Superintendent of Police, u Bah M.B Tongper MCS nalor kiwei kiwei ki ophisar.
Hadien ka jingialang bad ki ophisar, une u Myntri ka sorkar pdeng, ula leit ban shimbynta ha ka prokram ban sam ia ki song pisa sha ki 49 tylli ki kynhun na kylleng ki jaka jong ka Ri Bhoi District ia kaba la mang ha ka Payment Ecosystem Services (PES).
Haba kren ha ka jingialang, u Shekhawat ula pynpaw ia ka jingkmen ban ioh jingtip ba ki kam pynroi kiba la mang da ka Sorkar Pdeng lyngba ka Aspiration District ki dang iaid shakhmat bad bun ba la lah ban pyndep kat kum ka por bala buh.
Ula pynpaw ruh ia ka jingkmen ban iohi ia ka jingurlong ka jingangnud jong u Myntri Rangbah Duh ka Ri u Narendra Modi ban kyntiew bad ban pynroi ia kito ki District kiba dang sahdien ha ka Ri India baroh kawei.
U Shekhawat ula pyntip ruh ba kane ka Sorkar ba mynta hapoh ka jingialam u Narendra Modi kala pynwandur ia kiba bun ki skhim ban kyntiew ia ki Longiing baduk.
“Ka Sorkar Pdeng kala phaikhmat bha sha ka thain Shatei Lam Mihngi ban kyntiew ia ka roi ka par hynrei ki paidbah ki donkam pat ban sngewthuh ia ka jingkordor ka mei mariang bad ban iada ia ka khnang b aka lawei kan nym don hapdeng ka jingeh” ula ong haba ai jingiaroh ia ki Shnong bapher bapher kiba la shimkhia ban pyntreikam ia ka skhim PES ban iada ia ki khlaw ki btap.
