Shillong, Naiwieng 04 : Haba phai iaki khmat sha ka thong ba hakhmat, ka kynhun nongiasiat khnam (archery) ka Jylla kila pynjur ia ka jingkilan met (practice) mynta ban ioh rah ia ka nam ia ka Jylla ha ka North East Olympic Games 2022 ka ban long shen ha Jylla.
Kane ka kynhun ialehkai kala pynlong ia ka jingkilan met ha ka Training Camp kaba ba pynlong ha ka SAI Training Centre kaba don ha NEHU Campus. Kane ka kynhun kala kilan met haduh 10 kynta shisngi ban pynkhreh ia ka lympung ka ban long naduh ka 10-16 tarik Naiwieng ha kane hi kajuh ka madan ialehkai.
Ki don haduh lai bynta ha kane ka jingiakhun ba kynthup ia ka Compound, Recurve bad ka Indian Round-baroh ki don dala ki jong ki ryntieh bad ki jnit ki jnat kiba iapher.
Kiba khmih bad ai jinghikai ia kine ki nongsiat khnam i dei i coach Bansaralin Dhar iba la mihkhmat ia ka India sha ka World Archery Championship bad ka Asian Outdoor Championship shuwa ba in shimti ia ka kam coach ban hikai ia ki samla ka Jylla.
Ine i coach ila khmih lynti ia ka Manipur, Assam bad Nagaland ban sei ia ki nongsiat khnam kiba hap ban iakhun tyngeh hynrei i don ruh ka jingkyrmen ba ki nongsiatkhnam ka Jylla kin ialehkai kham bha.
Iwei na ki nongsiatkhnam iba hap ban iaphaikhmat bha i dei I samla Damandashisha Pasi, iba la bun kam bha ha kine ki khyndiat sngi namar ka jingiashimbynta ha ka Junior National Archery Championship kaba long ha Goa bad I ban sa wan phai sha Shillong ha ka sngi U Blei.
“Nga la kyndeh har har ban leit sha Goa” ila ong hashuwa ban mih na Nongbah haba ai khublei ruh ia ka Archery Association of Meghalaya kaba la ai ka lad ia i ban leit iashimbynta ha kane ka lympung. “Nga kyrmen ba ngan lah ialehkai bha hangtei, wan phai bad ialehkai bha ha ka North East Olympic games ruh, kane ka dei ka thong jong nga” ila ong.
Kane ka National Championship ka dei ka rynsan kaba heh bha ia ine I samla ba 19 snem na West Jaintia Hills namar ka lah ban plie lynti ia i ban ioh jaka ha ka Khela India Scheme bad wat ha ka kynhun ialehkai ka India.
Ka jingjop ha ki lympung ks Ri ka mut ruh ia ka jingioh khusnam song pisa na ka sorkar Jylla, kaba la pynkiew ia ka khusnam song pisa ha kine ki saw snem bala leit noh. I Damandashisha Pasi I dei iba la ioh ia ka khusnam namar ka jingioh khur medal ha ka 4th Meghalaya Games.
