Shillong, Naiwieng 02 : Ka Tnad Meghalaya Police hynnin ka sngi ba-ar kala kala kem ia u Assistant Inspector General of Police (A) Bah G.K.Iangrai, uba don hapdeng ka jingshah tohkit halor ka jyrsieh thied kali khlem ka jingbit.
Ki Heh Pulit kila pynthikna ia kane ka jingkem hynne ka sngi Balang hadien ka jingkhynra.
Kane ka jingkem kala wan jia ruh ha ka por ba ka Iingkashari Meghalaya High Court kala pynkhreh ban shim bishar ia ka PIL ba sahteng halor kane ka kam, hynne ka sngi balang.
Ka Iingkashari kala bitar halor ka jingbym leh eiei jong ka Tnad Pulit halor kane ka kam ha kine ki sien shong bishar bala dep.
Ka Tnad CID kala register case pyrshah ia u Bah Iangrai ha ka 28 tarik Risaw halor ka Prevention of Corruption Act. Ia kane la pynbud da ka jingthaw ia ka Special Investigating Team (SIT) bala khlieh da u DIG (Eastern Range) Davis Marak.
Hashuwa kane, ka kynhun tohkit Fact Finding Team bala khlieh da u Inspector Geneal (Law & Order) Mukesh Singh kala lap ia ka jingdonkti jong u Bah Iangrai ha kaban thied ia 29 tylli ki kali mynba u dang bat kum u AIG (A) khlem da ioh jingbit.
Ha ka kaiphod, ka Fact Finding Team jong ka Tnad Pulit bala khlieh da u Inspector General of Police (Law and Order) MK Singh ula ong ba haduh 29 tylli ki kali ki dei kiba la pyndonkam da u AIG (A) GK Iangrai shuwa u Iaiong 2022 khlem kano kano ka hukum na ki bor ba halor.
Napdeng kine ki kali, kawei ka Scorpio thymmai, kawei ka Bolero thymmai, artylli ki Swift Desire thymmai bad artylli ki bike Bajaj ba thymmai, ki dei ki bym pat ai number namar ka jingbym lah pynbiang ia ki kot ki sla da u AIG. Nalor kata, bun na kine kk kali kim don satia ia ka BS VI standards bad namar kata, kim iahap satia bad ka jingbthah jong ka Ministry of Road Transport & Highway…kaba dei ka jingpynkhein ia ki kyndon.
Nalor kine ki kali haneng, haduh phra tylli ki Bajaj Pulsar 150 cc ba dang thymmai kiba la thied ha u snem 2019 ki dei ki bym pat register namar ka jingbym don ia ki kot ki sla.
Kawei ka Hyundai Verna kaba set ha Central Workshop ka dei kaba la pyndait da u nombor thok bad ym pat shym la register satia ia kane ka kali da u AIG namar ka jingbym don ia ki kot ki sla.
Nalor kata, la ong ba ia kine ki kali ym shym la ai pyndonkam ruh sha kino kino ki Ophisar bad namar kata la dei ban shu buh ia kine kii kali kum ki Pool vehicle lane ai sha ki Ophisar ne ki Unit.
Ka kaiphod ka ong baka rukom leh jong u AIG(A) ha kine ki kam baroh ka pyni ia ka jingbym burom ia ka kam bad ka dei ruh ka jingleh ka bym iahap kum u Ophisar.
Namar kine ki jingshem, la pynkynriah kam ia u Bah Iangrai kum u Commandant ka SF-10. Kawei ruh ka jingtohkit ba iadei bad ka jingtei ia ka National Emergency Response System (NERS) Building ha Sadar Police Station, kala jer kyrteng ia u Bah Iangrai ba u pyndonkam bakla ia ka pisa.
