Itanagar, Naiwieng 02 : U Myntri Rangbah ka Arunachal Pradesh u Pema Khandu ula ong ba ka jingiakajia pud kaba la neh da ki phew tylli ki snem bad ka Assam lah ban pynkut noh ha kaba kut jong une u bnai Naiwieng.
U CM Khandu ula pynlong ka jingialang bad ka kynhun ki nongmihkhmat ba halor ka sorkar Assam, kaba kynthup ia u myntri ba dei khmih bad iada ia ki jaka khappud u Atul Bora ha kane ka sngi Nyngkong ba la lah.
Haba kren sha ki lad pathai khubor hadien ka jingialang u CM ka Arunachal ula ong ba kane ka jingialang la shim ba kadei kaba seisoh tam napdeng kiba bun tylli ki jingiakren ba la pynlong hapdeng kine ki artylli ki ri ba marjan da ka jingthmu ban lah ban pynkut noh ia ki kam iakajia pud hapdeng jong ki.
“Yn dang pynlong biang sa kawei pat ka jingialang hapdeng jong nga bad u CM ka Assam u Himanta Biswa Sarma na ka bynta ban ai ka jingmynjur kaba khatduh bad ka ban pynkut noh shisyndon ia ka jingiakajia pud hapdeng kine ki ar jylla.Baroh arngut ngi don ia ka jingangnud ban weng noh ia baroh ki jingiapher jingmut hapdeng jong ngi ha kaba kut jong une u bnai Naiwieng,” ong u CM Khandu.
U Sarma bad u Khandu ha ka 15 tarik u Naitung ba la dep kila iasoi ia ka jingiamynjur ha Namsai hapoh Arunchal Pradesh na ka bynta ban pynkut noh ia ki kam iakajia pud hapdeng kine ki ar jylla bad shim ruh ia ka rai ban pynduna ha kaba iadei bad ka jingdon jong ki shnong kiba don hapdeng ka jingiakynad sha ka 86 ha ka jaka jong ki 123 tylli.
Na ka liang u Khandu ula ong ba hadien katei ka jingiamynjur ha Namsai, 12 tylli ki committee kawei kawei ba la khlieh da ki myntri ka cabinet la thaw da kine ki artylli ki jylla.Kine ki committee ryngkat lang kila pynlong ka jingleit jurip sha kitei ki jaka, kila shim ia ki jingpynsngew na ka liang ki paidbah nongshong shnong na baroh arliang bad phah ia ki kaiphot jong ki shala ki jong ki sorkar.
