Shillong, Risaw 31 : Ka Sorkar Jylla kala buh ia ka por ba thymmai ban pyndep noh ia ka jingtei jong ka Iingdorbar Thaw Ain ba thymmai ha Mawdiangdiang, New Shillong hapoh ka hynriew bnai.
“Ka Sorkar Jylla kala buh por hynriew bnai bad kala iakren halor ka jingpynwan dur thymmai ia u dome jong ka Iingdorbar Thymmai” pyntip u Chaimran ka HPC bad Lamphang ka Iingdorbar Bah Metbah Lyngdoh hadien ka jingialang jong ka HPC bala iashimbynta da u Myntri Rangbah ka Jylla Conrad K Sangma, Symbud Myntri Rangbah Bah Prestone Tynsong bad kiwei kiwei ki heh sorkar.
U Bah Metbah ula pyntip ba la bthah ruh ia ki nongleh design ba kin aiti ia ki jingtip ba pura halor ka jingpynwandur thymmai ia u dome hapoh ka 30-34 taiew ban wan.
Ki Nongpynwandur ia u dome kila ai saw jait ki rukom shna ia u dome sha ki dkhot ka Committee. Une u Dome ba thymmai un khia kumba 1/10 na u dome ba plan nyngkong khlem kano kano ka jinghap pynlut biang da ka Sorkar Jylla.
“Napdeng ki saw jait, u dome ba-ar u dei uba la jied bad mynjur da ka HPC” pyntip u Lamphang.
U Lamphang u pyntip ba u dome bala mynjur da ka HPC un dei da ka steel frame bad katto katne da ki tiar glass fibre reinforce concrete (GRC) bad ki nar bad ruh ki pre-coated galvanized iron (GI) sheets.
U Dome uba khyllem u dei uba khia haduh 3000 ton hynrrei une u dome ba thymmai un khia tang 250-300 ton, pyntip u Lamphang.
