Shillong, Risaw 31: Ka Congress kala sngew skhem ba ka jingiakhun ia ka elekshon MLA-2023 ha Ri-lum Garo kan dei beit bad ka National People’s Party ( NPP) ba ialam da u Conrad K Sangma katba ka All India Trinamool Congress ( AITC) bala pynpaw nam jubor ha ki rynsan pathai khubor bad ba ialam da u Dr Mukul Sangma kan ym mih kyrteng satia ha ka jingiakhun.
Haba iakren bad ka Working President ka MPCC Deborah Marak kaba don ha New Delhi ha ryngkat u ma Vincent Pala bad Kong Wansuk Syiem ban iakynduh ia u President thymmai ka AICC Mallikarjun Khagre, kala ong ba ka jingiakhun ia ka bor ha Ri-lum Garo kan dei beit tang hapdeng ka Congress bad NPP.
“Kam dei satia ka TMC hynrei ka NPP kaba Synshar ia ka Jylla kan dei ka kynhun ba ngin hap iakhun ha kane ka elekshon ban wan, ngim don jingartatien ia kata” ong ka Deborah.
Kala iathuh ba ha ka jinglum jingtip jong ka Congress na ki shnong ki thaw kala pyni ia ka jingiakhun tang jong kine ki artylli ki party ha kiba bun ki constituency ka Ri-lum Garo.
“Ngim da khuslai than ia ka jingiatynjuh bad ka NPP namar ka Ri-lum Garo ka dei ka jaka ba khlain bha ka Congress. Ka don kyrhai ki nongkyrshan na ki nongthep vote ha Ri-lum Garo bad ngin pynleit jingmut bha ia kane” kala ong.
Ka Deborah kala pynpaw ba ki nongialam ba hakhlieh ka Congress kin sa pynleit jingmut bha sha ka thain shatei lam mihngi bad ka Meghalaya ha kane ka elekshon ban wan.
“Ki nongialam jong ngi mynta ki dang bunkam ka ialap elekshon ba Himachal Pradesh ka ban iathep vote ha u bnai ban wan. Shisien ba kut kane ka elekshon, kin sa pynleit jingmut sa sha ngi” ong ka Deborah.
Kat kum ka jingong jong kane ka Myntri Sorkar barim ka Jylla, ka Congress ka dang pynkhreh mynta ia ki buit na ka bynta ka elekshon ban wan ha Meghalaya bad ki nongialam na Jylla kin sa iakynduh ruh ia ka Sonia Gandhi ban twad jingmut na ka halor ka kam sain pyrthei ba kynthup ia ka Meghalaya.
Ka jingiakynduh ba arsngi hapdeng u ma Vincent bad ka Deborah ia u Khagre kala kut hynnin ka janmiet sngi U Blei, kala pyntip.
