Bokajan, Risaw 29 :Ka jinglong jingman kala kyan ha ki bynta jong ka Sukhanjan hapoh ka sor rit Bokajan ka Assam ha ka sngi Palei ba la lah hadien ba ki katto katne ki heh na ka tnat Taxation ka KAAC kiba la wan ban jurip ia ki laisen khaii kila ngat ha ka jingshah thombor ha ki nongkhaii jong ka thain kiba don hapdeng ka jingbitar.
Katkum ki khubor la ong ba kine ki heh ka tnat Tax kiba la pynlong ia ka jingjurip kaba kyndit kyndit ha kaba iadei bad ki laisen khaii ha katei ka jaka kila poi sha ka jingiania kaba jur bad ki nongkhaii hadien ba ki nongkhaii kila khangdam ia ki dukan jong ki bad ialum lang ban pynlong ka jingiakhih pyrshah ia kine ki heh sorkar.Na ka liang ki nongleit nongwan kumjuh ki briew kiba don ha kane ka jaka kila pyniasoh lang ia kane ka jingiakhih pyrshah.
Ka jingwan tuklar jong uwei u runar ba la tip kyrteng kum u Bijay Singh kala nang pynjur shuh shuh ia ka jingiakynad bad kaba la lam ruh sha ka jingiakthakti hapdeng ki nongkhaii bad kitei ki heh ka tnat tax bad kaba la lam ruh ka jingiamynsaw kaba malu mala.
Ha kawei pat ka bynta na ka liang ki bor pulit kila wan mardor ban tuklar bad ban pyllait ia kine ki heh sorkar da kaba ialam noh ia ki shapoh police station.Na ka liang kitei ki nongkhaii ruh kila bteng ia ka jingiakhih ka jong ki da kaba ialum lang hakhmat jong ka police station.Hadien na ka liang ki bor pulit kila pyndonkam katto katne ka bor ban pynpra ia kine ki paidbah.
“Ngi la rejistar case hapoh Bokajan Police Station bad ka jingtohkit kala iaid shakhmat. Sawngut ki briew ia kiba la tip kyrteng kum u Rajkumar Rai, Raju Tripathi, Ajay Singh bad u Jaggu Shah kila shah rah noh ha ki pulit ha kaba iadei bad kane ka jingjia.Ngin shim ka jingpynshitom pyrshah ia kito kiba donkti.Ngi dang bishar bniah lyngba ki video jong katei ka jingjia bad ngin dang bteng ia ka jingkem,” ong u SDPO, u John Das.
Lah ban kdew ba ka tnat Taxation ka KAAC khnang ban pynjur ia ka jingpynmih pisa kala kyntiew ia ka khajna kaba shisien shi snem lyngba ki laisen jong ki nongkhaii da 100 percent bad la kynnoh ruh ba kala pynmih ruh ia ki kyndon ain kiba kynrum kynram hapoh Karbi Anglong.
“Katkum ki kyndon ain kiba thymmai, baroh ki dei ban don ia ki laisen khaii pateng, kata wat ia ki nongkhaii kiba rit ba ria.Kino kino ki jingtreikam naduh ki nongsuh juti haduh ki nongkhap shniuh ki dei ban ioh ia ka laisen ban leh ia ki kam khaii hapoh ki jaka ba khmih da ka KAAC.Nalor kata kala don ruh ka jingtehlakam ha kaba iadei bad ka jingduh ia kiba bun ki mar katkum ka laisen.Kum ka nuksa, ka dukan die kwai ne pan shop ka dei kaba la ioh bor tang ban die kwah bad ym da kiwei pat.Kiba dei sa ia ki shoklet, um dih, chips bad kiwei pat kin shah kyntiew shuh shuh ha ka khajna,” ong uwei na ki nongkhaii.
