Shillong, Risaw 28: Ka tnat pulit hynne ka janmiet sngi thohdieng, kala Register ia artylli ki ‘Suo Moto’ case pyrshah ia ki Nongiaid rally jong ka FKJGP halor ka jingshah shoh ki briew ba iaid ba ieng ha ki thain Dhankheti bad Police Bazaar.
Ia kine ki case la register kawei ha Laitumkhrah Police Station bad kawei ha Sadar Police Station.
Lah ban kdew ba kala don ka jingshah shoh ki briew kiba iaid ba ba ieng bad ka jingshah pynjulor ki kali ha ki briew bym lah ban ithuh dukhmat haka por ka jingiaid paidbah ba la pynlong daka Federation of Khasi Jaintia and Garo People (FKJGP) na Motphran shaduh Madan Iewrynghep.
Ka kyrwoh naka tnat Pulit ka kdew ba kane ka jing Register Case kadei naka bynta ban shim ia ki sienjam kat kum ka lynti jong ka Ain pyrshah ia ki briew kiba jrongkti ia ki nongiaid nongieng bad ki kali.
Ka Deputy Commissioner ka East Khasi Hills ruh kala phah ia ka show cause notice sha ka seng FKJGP halor ka jingpynkhein ia ki kyndon bala ai ban pynlong ia ka rally ha Shillong.
