Shillong, Risaw 28: Ka Sur Ka Bri U Hynñiewtrep hynne ka sngi thohdieng, kala pynpaw ia ka jingkyrshan pura ia ka Save Hynñiewtrep Mission jong ki san seng ha kaba ïadei bad ka bha ka miat jong ka jaitbynriew baroh kawei.
Ia kane la pyntip daka organizing secretary ka Sur ka Bri U Hynniewtrep ka ka kong Purity Phawa haba kren sha ki lad pathai khubor.
Ka kong Purity ka la ong ba ka Sur ka Bri u Hynñiewtrep ka kyrshan ia ka Save Hynniewtrep Mission ban dawa pyntreikam ïa ki 9 tylli mat kynthup naduh ka Inner Line Permit (ILP), u pud u sam, ka iohkam ïohjam lem bad kiwei kiwei.
Ka la ong ba ka Sur ka Bri u Hynñiewtrep ka ngeit shkem ba lyngba kane ka jingtreikam jong kine ki 5 seng yn sa lah ban beh ïa kita ki kruiñ kiba ktah ia ka imlang ka sahlang hi baroh kawei.
“Naka liang ka Synjuk ngi kyrshan iaka Save Hynñiewtrep Mission hynrei ki 5 seng ruh kidei ban trei iaki kam bad ban pynbor ia ka sorkar ba kan pynurlong iaki 9 tylli ki mat ba ki seng bad ki paidbah ka jylla Meghalaya ki dawa” la ong ka kong Purity.
Ka kong Purity kala ong ruh baka Synjuk ka kyrshan iaka jingdawa ban pyndam noh iaka jingthmu ban wanrah Casino hapoh la jylla nanar kane kum ka kyiad ka long ka jingma iaka imlang sahlang.
