Jowai, Jan 19: Ki Nongialehkai na ki 11 tylli ki District ryngkat bad ka West Jaiñtia Hills kaba pynlong ia ka Meghalaya Games kaba Hynriew, kila ia poi hynne ka sngi u Blei ha Madan Ladmukhla, Jowai ban pynkhreh ban iashimbynta ha katei ka lympung iakob ialehkai.
Ia kine ki nongialehkai la pdiang sngewbha da u MLA ka Jowai u Bah Wailadmiki Shylla, u Deputy Commissioner u Bah B.S Sohliya ryngkat bad ki heh ophisar jong ka District bad na ka jylla.
Ki nongpyniaid ia kane ka lympung iakob ruh kila iadonlang ha katei ka madan ban peit bad ban pynbiang ia ki jingdonkam bad pynthikna ba baroh kin long kiba biang lut.
U Bah Wailadmiki Shylla ula pynshlur ia ki nongshong shnong jongka West Jaiñtia Hills District ba kin pdiang sngewbha bad ban kyrshan ia kine ki nongialehkai ha ka por ba ki sah ha ka District ban pynlong kaban sah jingkynmaw.
Katto katne ki nongialehkai kila pynpaw ia ka jingkmen bad iaka jingsngewhun ha kaba iadei bad ka rukom pynbiang bad bun kila pynpaw iaka jingsngewtynnad halor ka jingshah pdiang sngewbha kaba la long kaba la pynkhreh janai bha.
