Shillong, Iaiong 20 : Ka kynhun ialehkai ki Khynnah U-14 ka Meghalaya, kala pynliem ia ka Mizoram da 47 run ha ka jing ialehkai sdang jong ka 1st North East Little Master’s Trophy 2025 ka long ha Guwahati hynne ka sngi U Blei.
Ka Meghalaya ka don ha ka Group A ryngkat ka Assam, Mizoram bad Arunachal Pradesh. Ka Tripura, Manipur, Nagaland bad Sikkim ki don ha ka Group B.
Ia kane ka lympung ialehkai U-14 la pynlong da ka Assam Cricket Association.
Ka Mizoram kala jop ia ka jingkynting pisa bad phah ia ka Meghalaya ban tied nyngkong ha ka jingialehkai ba 40 over shi liang. Ka Meghalaya kala lah ban kamai haduh 145 runs ha ka 34.3 over ia kaba ka Mizoram kala lah ban beh tang 98/10 ha ki 27.5 over.
Ka jingioh kamai extra run kala synniang bun eh ia ka jingioh runs ka Meghalaya. Ka Mizoram kala ai haduh 44 tylli ki wide.
Na ki nongtied ka Meghalaya kiba kamai bun eh ki runs ki dei u Sahil R Marak uba ioh 29 run na ki 37 bol, u Jagrit Thakur uba ioh kamai 20 run n aka 28 bok.
Ka Meghalaya kala sdang ia ka innings ba ar da ka jingshim wicket ha ka bol ba nyngkong eh kaba la kawang da u Calvin Syngkli. San ngut na ki 7 ngut ki nongtied ka Mizoram kila ioh duck ne nod run.
U Sahil ula ialehkai bha bad ka bol kum ha ka por ba u leit tied bad ula ioh shim haduh 4 wicket bad ai 20 runs na ki 4.5 over. U Janggi K Marak ula shim 2 wicket n aka 8 bol ha ki 3 over bad kiwei pat kiba shim wicket ki dei u Ashwin Shah (1/8 na ka 3over), Abhinav Khanal (1/7 na ka 7 over), Calvin (1/16 na ka 4) bad Aditya Singh (1/25 naka 5 over).
