Shillong, Iaiong 25 : U Nongkawang bol ka Meghalaya Abhinav Khanal u la shim ia ka hat-trick ban pynshong nongrim ia ka jingjop ba 7 wicket ia ka Meghalaya pyrshah ia ka Arunachal Pradesh ha ka 1st North East Little Masters Trophy 2025, kaba dei ka lympung ialehkai jong ki khynnah U-14 ha Guwahati hynne ka sngi Thohdieng.
Haba tied nyngkong, ka Arunachal ka la shah pynhap noh tang hapoh shikynta tam bad lah kamai tang 41 ron ha ki 14.1 over na ki 33 over ba la mang. Ka Meghalaya ka la beh ia kane ka thong tang hapoh ka 11.4 over ba hap tang lai wiket.
Ka jingïalehkai kaba itynnad bha jong u Abhinav ka la pynkhyllem ïa ka kynhun nongtied ka Arunachal ha kaba une u nongkawang bol ka Meghalaya u la shim 7/3 ha ki 3.1 over, kaba kynthup ïa ka hat-trick.
U Abhinav u la shim ia ka wiket ba nyngkong jong u Nabam Jamper ha ka over kaba 11 bad nangta u la jam shakhmat ban pynhap sa ïa ki arngut ki nongtied kiba bud kiba la ioh kamai da u nod. U la shim ruh sa kawei pat ka wiket na ka bol kaba san ban shim ia ka wiket kaba saw ha ka shi over. Ula shah jied kum u Player of the Match haba kut ka jingialehkai.
Ka Arunachal ka la hap kloi ia ar tylli ki wiket ha u Calvin P Syngkli (2/9 ha ki 3 over) hynrei ka la kiew na ka 4/2 sha ka 37 khlem da hap wiket shuh. Hynrei la wan u Abhinav uba la pynjot ïa ka kynhun pyrshah, ha kaba san ngut ki nongtied ki la hap leit phai sha ka jaka shong khlem da pyndap wat tang kawei ka run. U Tamser Ngurang u la kamai bun eh ia ka Arunachal da kaba kamai 18 ron shwa ba un shah pynhap wiket ha u Abhinav. Kawei pat ka wiket ban hap ka dei kaba la shim da u Donsrang Chubat Sangma (1/2 ha ki 3 ober).
Ka jingbeh ia ka thong ka long kaba suk bha hynrei ka Meghalaya ka dang duh arngut ki nongtied ha ki run out bad uwei pat u la shah kem hadien. Hynrei u Laisan Khongji (11) bad u Abdulla Pathaw (10 ) ki la leh bha ban pynïajan ïa ka Meghalaya sha ka thong bad u Abhinav (6 khlem hap wiket) bad u Janggo K Marak (1 khlem shah hap wiket) ki la ïalam ïa ka kynhun sha shilliang u lain ka jingjop.
Kane ka dei ka jingïalehkai group kaba lai bad kaba khatduh jong ka Meghalaya. Ka la pynliem ïa ka Mizoram da 47 ron ha ka jingïalehkai ba nyngkong jong ka ha ka 20 tarik Risaw shwa ba kan shah rem ha ka Assam da 9 wiket ar sngi mynshwa.
Kumta ka Meghalaya ka don ha ka kyrdan kaba ar ha ka Group A. Ki ar tylli ki kynhun kiba wan hakhmat duh kin rung sha ka semifinal.
