Shillong Jylliew 26: U Myntri Khynnah ka Sorkar Pdeng uba khmih ia ka tnad Electronics & Information Technology bad Skill Development & Entrepreneurship u Rajeev Chandrasekhar yn wan iuhkjat ha Nongbah Shillong ha ka sngi Balang bad yn pynlut por ar sngi ha ka jylla Meghalaya.
Ha katei ka jingwan jong u Myntri Khynnah yn iakynduh ia ki nongialam jong ki seng sai pyrthei ka jylla, ki khlieh nongsynshar shnong, ki heh nongkhaïï da ka jingthmu ban pyni ia ka jinglah jong u Myntri Rangbahduh ka ri ban pynurlong ia kiba bun ki mat ha kine ki 9 snem kiba la dep.
Une u Myntri yn wanpoh ha nongbah Shillong, ha kaba yn sdang lum iaka jingialang bad ki heh jong ka seng ha ka jylla bad ha ka nongbah bad hadien kane yn leit jngoh iaka Cathedral of Mary Help of Christians bad yn iakren ruh bad ki nongialam ha ka imlang sahlang.
Hadien kane u Myntri yn iakynduh bad iakren ruh bad ki lad pathai khubor bad yn leit ruh ban iashimbynta ha ka Sampark Se Samarthan bad yn leit ruh ban rung ha ki ïingbriew ban iakren bad ki nongshong shnong ha kaba iadei bad ka jingshakri ka sorkar u Narendra Modi ha kine ki 9 snem.
Yn pynkut ia kane ka sngi da kaba iakren bad ki riewpawkhmat ka jylla bad yn iakren ruh bad ki heh nongkhaïï ka jylla.
Ha ka sngi ka Baar u Rajeev Chandrasekhar yn btengbanleit ha ki shnong ki thaw bad ban iakynduh ia ki riewshiemt kiba mihkhmat ia ki jaidbynriew bapher bad ha ka por janmiet yn iakynduh bad ki nongkhaïï kiba seng ia ki kam ki jam ki jongki hapoh ka jylla.
Kane kan dei ruh ka jingwan jngoh u Rajeev Chandrasekhar ha ka sien ka baar ia ka jylla hapoh 6 bnai bad ha ka jingwan ka jongu ha u Kyllalyngkot ula pyllait paidbah iaka PMKVY 4.0, kaba dei shi bynta jongka Skill India Mission ha nongbah Shillong.
