Hailakandi, Nohprah 09 :Haduh kumba 1000 ngut ki lehnoh Bru kin wan ban pyndem noh ia ki tiar ialeh jong ki bad ban wanphai pat sha ka lynti kaba dei ha ka jingialang pyndem wait ka ban long ha ka 12 tarik mynta u bnai ha Hailakandi district ka Assam.
U Superintendent of Police ka Hailakandi u Nabaneet Mahanta haba kren halor kane ka bynta ula ong ba ki dkhot jong ka kynhun kieng atiar United Democratic Liberation Front of Barak Valley (UDLFBV) bad na ka kynhun Bru Revolutionary Army of Union (BRAU), kiba la don mynta hapdeng ka jingsangeh iasiat kin wan ban pyndem noh ia ki tiar ialeh jong ki ha Katlicherra, kumba 28 km na ki bynta khappud ka jylla bad ka Mizoram.
Na ka liang u Lamphang ka iingdorbar assembly ka Assam u Biswajit Daimary bad u Myntri ka tnat Water Resources and Parliamentary Affairs uPijush Hazarika kin ia don ryngkat lang ha katei ka jingialang pyndem wait.
Nalor kata kala don ruh ka jingkyrpad ia u Superintendents of Police jong ka Hailakandi, Cachar, bad Karimganj district na ka bynta ban pyni paidbah ia kine ki tiar ialeh ia kiba yn wan pyndem da kitei ki dkhot kieng atiar ha katei ka jingialang.
Ka sorkar pdeng, ka sorkar Mizoram bad Tripura kumjuh ka kynhun Mizoram Bru Displaced People’s Forum (MBDPF) kila poi sha ka jingiamynjur ha ka snem 2018 ha kaba iadei bad ka jingpynphai pat ia ki longiing na ka jaidbynriew Bru ha kaba kala sdang ruh ka jingiakren bad kine ki kynhun kieng atiar na ka bynta ban wanphai pat sha ka lynti kaba dei ha ka imlang ka sahlang.
Na ka ling ki bor pulit kila ong ba baroh kitei ki artylli ki kynhun kieng atiar ki dei kiba treikam bha ha ki snem 1990 ha ki jaka khappud ka Assam bad Mizoram, khamtam hapoh Hailakandi district.
Kine ki kynhun la kynnoh ruh ba ki dei kiba donkti halor ka jingshah pyniap jong u nongialam ka BJP u Pratul Deb uba la wanphai sha India na London hadien ka jingshongthait noh kumjuh halor ki kam dawa pisa jubor, ki kam rahbor bad kiwei pat ki kam pyntriem.
