Kohima, Nohprah 09 :U heh nongialam ka seng Congress ha Nagaland u K.Therie ula kam ba hapoh ka kynhun synrop jong ka Nationalist Democratic Progressive Party (NDPP), Bharatiya Janata Party (BJP) bad ka Naga People’s Front (NPF) ki nongshong shnong ka jylla kila iaid mynta sha ka lawei ka bym lah ban tip.
Ha ka jingpyllait khubor, une u president ka seng Congress ula thoh; “Ki nongshong shnong ka Nagaland kila iaid mynta sha ka lawei ka bym lah ban tip hapoh ka jingialam jong ka kynhun synrop ka NDPP, BJP bad ka NPF.Ngim lah ban tip la yn pynlong ne em ia ka ilekshon.”
Haba kren halor ki jingiakren hapdeng ki kynhun seng bad ka sorkar jylla naduh u bnai Nailur ba la dep ha kaba iadei bad ka jingdawa pyntreikam ia ka jingsynshar president na ka bynta ban lah ban weng pat ia ki jingeh jong ki jaidbynriew Naga, hynrei haduh mynta ym lah ban tip kiei ki jingmih na ki jingiakren namar na ka liang ka sorkar jylla kam shym la shimkhia halor ki jingiakren bad ki kynhun kiba iadon bynta.
“Ngim tip ia ka jingiasngewthuh jingmut kaba hapoh hapdeng u Myntri ka sorkar pdeng u Amit Shah bad ka ENPO ha kaba iadei bad ka jingdawa ia ka jylla ‘Frontier Nagaland.’ Lah ruh ban shu mutdur ba ka jingkyrshan ia ka BJP kan long ka daw kaba lah ban pdiang halor katei ka jingdawa,” ong shuh shuh ka jingpyllait khubor.
Nalor kata katei ka jingthoh kala ong ruh ba ka NPF, NDPP bad ka BJP kim don satia ia kano kano ka jingkut jingmut kaba thmu na ka bynta ka bha ka miat bad ka roi ka par jong ka jylla.
Shuh shuh da kaba kam halor ka jingleh bym suitniew pyrshah ia ka ENPO, une u nongialam ka Congress ula ong ruh ba ka sorkar jylla ka dei ban shim ia ka jingkitkhlieh halor ka jingpynlong ia ki ba kin dawa noh la ka jong ka jylla ‘Frontier Nagaland’.
“Ka sorkar jylla kala shah ia ka sorkar India ba kan ialehkai bad ka lawei jong ki paidbah nongshong shnong ka Nagaland mynta la slem bha,” ong shuh shuh katei ka jingthoh.
