Shillong, Naitung 05 : Ka Meghalaya bad ka Philipines ha ka sngi Thohdieng, kila iamir jingmut halor ki lad ki lynti ban iaphah markylliang ia ki kaitor bad ki kynhun nongtem (musical exchange), ka ban iarap pynpoi ia ki kaitor bad nongput nongtem ba dang khie ka Jylla sha ki rynsan ka pyrthei.
U Myntri kam jngohkai Bah Paul Lyngdoh, ula iakren ia kane ka jingtyrwa bad u Harsh Kumar Jain, u Ambassador ka Ri India sha Ukraine uba sa leit noh kum u Ambassador sha ka ri Philipines.
Kawei na ki jingtyrwa bala iakren bha ha kane ka jingiakynduh ka long ban pynlong ia ka prokram iaphah markylliang ia ki kaitor bad ki nongtem, ka ban iarap ia ki nongtem ba dang khie ka Meghalaya ba kin paw ha ka pyrthei, kaba la ai mynsiem da ka jingjop jong ka Meghalaya Grassroots Music Project (MGMP), kaba kyrshan ia palat 3000 ngut ki nongput nongtem bad ki kaitor.
“Ka jingtyrwa kaba nga la iakren bad u ka long ba kumno ngin leh, kum u Ambassador, un iarap ban pynurlong ia kane ka prokram ka ban pynlong man k aka por hapdeng ka Philipine bad ka Meghalaya. Ngi la iaren ruh halor ka kolshor bad kiwei kiwei” ong u Bah Paul hadien ka jingialang.
“Kawei na ki kam ba paw eh ka Philipines ka dei ha ka put ka tem bad ka arts. Kumba phi tip, ki Filipinos kila paw ha satlak ka pyrthei da ka sap ha ka put ka tem bad ka rwai ka siaw, bad kila kiew ruh ha kiba bun ki rynsan ha kylleng ki sor ka Ri India bad ki Ri ka pyrthei” ula bynrap.
U Bah Paul ula kren ruh halor ki lad ban iatreilang ha ka kam jong ka koit ka khiah kynthup ia ka jingplie kabu na ka bynta ki samla pule doktor bad nos na Meghalaya. Ula pynpaw ba u Ambassador ula kular ban sa nang wan iuhkjat bha sha Meghalaya ban pynkhlain ia kane ka jingiadei.
Na ka liang u Harsh Kumar Jain ula ong “Ka jingthmu jong ka jingwan jong nga sha Shillong ka long ban kyntiew ia ka jingiadei hapdeng ka thain Shatei Lam Mihngi ka Ri bad ka Ri Philipine, kaba ngan sa leit long Ambassador ha kine ki khyndiat taiew ban wan”.
“Kumba phi lah ban tip, ka Act East Policy jong ka Sorkar India ka thmu ban kyntiew ia ka jingiadei hapdeng ka thain Shatei Lam Mihngi ka Ri India bad ki Ri ka dewbah ASEAN”.
U Jain ula ai ka jingiaroh ia ka kolshor, ka histori jong ka Meghalaya bad pynpaw ruh ia ka jinglyngngoh halor ka jingitynnad ka sawdong sawkun jong ka Jylla. Ula kular ban ai jingkyrshan ia ki samla pule n aka thain kiba pule shabar ka Ri bad pynshlur ruh ia ki ba kin pyniajan bad ka Embassy ha Manila.
