Shillong, July 5: U Myntri Rangbah ka Jylla u Conrad K Sangma ha ka sngi Thohdieng, ula leit jurip ia ki jaka kiba shah ktah ha ka jingshlei um ha West Garo Hills, kaba la ktah ruh ia kumba 30,000 tylli ki longiing.
Ha ka jingjurip ia kitei ki jaka, u Conrad Sangma ula khmih ia ka jinglong jingman bad ia ki lad ai jingiarap na ka liang ka bor pyniaid district sha ki lanot kum ha Silkata, Namabila bad Haripur.
Visited the flood-affected areas of Silkata, Haripur, and Namabila in the plain belt area of West Garo Hills, accompanied by Selsella MLA Arbinstone B Marak. Have directed the administration to ensure all necessary assistance and relief is provided. pic.twitter.com/n6LpaUwj19
— Conrad K Sangma (@SangmaConrad) July 5, 2024
Ka Wah Jinjiram kaba tuid najan jong kitei ki shnong kala kiew bad kane ka Wah kala mih na ki bynta jongka Goalpara District jongka Assam bad kala iaod lyngba ka Goalpara bad South Salmara district jongka Assam bad kala rung shapoh West Garo Hills bad nangne patnkala leit pyniasoh bad ka wah Brahmaputra.
Ha ki katto katne ki jaka, ka jingkiew ka um kala kot sha ka 5 haduh 6 phut bad katei ka um kala leit rung ha ki iing ki sem bad kala tap ruh ia ki jaka rep kaka riang.
“Ka long ka jingjia kaba sniew ha kaba kumba 30,000 tylli ki longiing kila shah ktah na ka jingshlei um ha katei ka thain̈, hynrei kam shym la don pat kano kano ka jongduh moh ia ka mynsiem briew kumba long haduh mynta” ong u Conrad Sangma hadien ka jingkhmih bniah ia ka jinglong jingman na ka jingshlei um.
Ula ai ka jingiaroh ia ko bor pyniaid district ha kaba ki ophisar kila treikam mardor ban pynthikna ba kan ym.dih ia ka jingim briew bad kila ai ruh ia ka jingiarap ia ki paidbah kiba la shah ktah bad la ai ruh ia ki iaka jaka sah kaba shipor.
“Haba don kano kano ka jingma, ki bor District kila pynkynriah noh mardor ia ki riewshimet sha ki jaka kiba shngain̈ bad sha ki shelter homes bad ki dang khmih bin pa bin ia ka jinglong jingman” ong u Conrad.
Ula ong ba ka sorkar kan ai jingkyrshan ia kito ki lanot kiba la shah ktah.
U Sangma ula sam ruh ia ki marbam mardih sha ki paidbah ha katei ka thain̈. Ula leit ruh ban iakynduh ia ki paidbah kiba sah ha ki jaka riehtngen kiba shipor bad ula bthah ia ki heh ophisar ba kin ai jingiarap mardor.
U Myntri Rangbah ula bthah ruh ia ki ophisar sorkar ban iatreilang bad ka jylla Assam ruh bad ban pan ia ka kaiphod khnang ba kin lah ban pynkhreh bha ialade lada jia ba ka jingshlei um kan nang jur bad sniew shuh.
