Agartala, Nailar 11: Ki 10,323 ngut ki nonghikai skul ha Tripura ki ba la shah weng noh na ka kam hadien ka jingshim rai da ka iingbishar high court ka Tripura ha ka snem 2014, ki la pynbna ba kin ioh pat ban bteng biang ha ka kam naduh ka 12 tarik mynta u bnai.
Kine ki nonghikai ki la pynbna ruh ba kin ai jingtip sha la ki jong ki skul da ka ba kam ba katei ka hukum ba la pynmih da ka iingbishar high court ka Tripura kam shym la thmu ban weng kam ia baroh ki nonghikai.
Ki la ong ruh ba lehse ka dei ka jingpynsngewthuh bakla da ka kynhun ki heh ophisar.
Ha ba pynshai sha ki lad pathai khubor ha Agartala, u Biswajit Banik u ba dei uwei napdeng ki 10, 323 ngut ki nonghikai u la ong ba ki la ujor sha ka iingbishar Supreme Court, ha ka ba la kdew ba ym shym la weng kam ia ki katkum ka hukum ba la pynmih da ka iingbishar high court ka Tripura.
Ka high court ka Tripura ka la weng kam noh tang ia kito ki nonghikai ki ba ka jingioh rung kam ka jong ki ka la ngat ha ka jingshah ujor ha kito ki kynhun ki ba la shah pynduh noh ia ki hok ki jong ki.
“Ngin sa pyniasoh biang ha la ki jong ki skul naduh ka 12 tarik mynta u bnai,” ong u Banik. U la ong ruh : “Lyngba ka RTI hapoh ka iingbishar Supreme Court ngi kwah ban tip ba ngim shym la duh noh ia ki kam ki jam ki jong ngi, bad ba ka sorkar kam shym la weng kam noh ia ngi.Ha ba jubab ia ka RTI la kdew ba ngim shym la dei ki kynhun ne party ki ba don ha katei ka jingialeh (case), kumta ruh kane ka jingshah weng jong baroh kam shym la treikam satia,” kam u Banik.
“Naduh ka sngi ka ba nyngkong, hadien ba ka iingbishar ka Tripura high Court ka la pynmih ia katei ka hukum, ka kynhun jong ki heh sorkar bad ki katto katne ki khwan myntoi shimet ki la ialam bakla ia ka kynhun myntri bad ia ka sorkar baroh kawei,” kynnoh u Banik.
Nalor kata u la ong ruh ba na ka liang ka iingbishar Supreme Court ka la kdew shai ba tang kito ki ba ka jingioh rung kam ka jong ki ka la ngat ha ka jingshah ujor ha kiwei pat ki ba iakhun bad ki ba dei ban ioh ia ka kam ki la shah weng noh na ka kam, hynrei kam shym dei ia baroh ki nonghikai.
Shuh shuh u la ong ruh ba ki la pyrshang ban pynlong ka jingiakren bad ka director ka tnat pule puthi ka Tripura.Hynrei kam shym la shah ia ki.Kumta ruh, ka lad ka ba khatduh ka ba ki don ka long ban aiti ia ka jingpynshai na ka liang katei ka iingbishar ba hakhliehduh ka ri sha ki baroh ki principal jong ki skul ki jong ki.
