Dang tohkit ki BSF ia ka jingshah thombor u Doktor ka Veterinary
Shillong, Rymphang 13 : Ka Sorkar Jylla hynne ka sngi Ba-ar, kala pynbna ban thaw noh da ki Coordination Committee ha ki Shnong Khappud, ban tem ia ka jingiasngew pher jingmut hapdeng ki nongshongshnong bad ki shipai shipai iada khappud- Border Security Force (BSF).
Ia kane la pyntip da u Director General of Police (DGP) ka Meghalaya Dr L R Bishnoi hadien ka jingialang bad u Symbud Myntri Rangbah ka Jylla Bah Prestone Tynsong, uba khmih iaka tnat kam pohing, haka jingdon lang u Inspector General (IG) BSF Meghalaya Frontier.
Kane ka la mih hadien arsngi ka jingshah thombor u Doktor ka Animal Husbandry & Veterinary ha ki shipai BSF ha Amlarem, kaba poi sha u pud ka jingphah law lyngkhuid ia ki jain bad byrngem ruh ban siat iap ia une u doktor.
Haba kren sha ki lad pathai khubor u Dr LR Bishnoi ula iathuh ba ia ki Coordination Committee yn khlieh da ki Sub Divisional Officer (SDO) haka jingdonlang ki SDPO, ki Company Commander ka BSF, ki Pulit ka Jylla bad ki nongialam shnong bad kine ki Committee kin hap ban shong jingialang man u bnai.
U Dr LR Bishnoi ula iathuh ba ka jingthaw iaki Committee kadei ban nang pynkhlain ia ka jingiadei hapdeng ki nong shong shnong bad ki shipai BSF kiba don haki thain khappud.
“Man u bnai, kine ki Coordination Committee kin shong ka jingialang bad kin don ruh ki nongialam shnong, ban tem ia kano kano ka jingiasngew thuh bakla bad ki BSF bad haka juh ka por ban nang pynkhlain ka jingiadei hapdeng ki nong shong shnong haki thain khappud bad ki BSF” la ong u Dr LR Bishnoi.
Kumjuh ruh u Symbud Myntri Rangba ula iathuh “Kala don ka jingialang hynnin ka sngi halor ka jingjia ha Amlarem bad ia katei ka jingjia la dep ban iapynbeit noh..Ngam kwah ban kren eiei shuh halor kane ka mat namar ba kadei kaba la dep ban iapynbeit. Ngin sa pynmih noh ia ka jingpynbna ban thaw ia ka Coordination Committee ha kylleng ki thaiñ khappud jong ka jylla kiba don marjan bad ka ri Bangladesh”.
U Bah Prestone ula pyntip ruh “Kitei ki Committee kin ia shong pyrkhat halor kiba bun ki mat la kadei halor ka kam khaïï tuh, ka jingwanrung tuh ki nong Bangladesh shapoh ka jylla ne kino kino ki jingjia ha khappud”.
U DGP ula pyntip ba hakane ka jingialang u IG ka BSF ula kular ba kum kine ki jingjia huri hura hapdeng ki riew paidbah bad ki BSF kin nym jia shuh hadien habud.
Haba kylli halor ka jingshah kynnoh leh tohmet u Doctor ka tnat Animal Husbandry and Veterinary haki BSF, u DGP ula ong “Ka BSF ruh ka dang pynlong ka jingtohkit bad naka liang u IG ruh ula kular haka jingialang ba un khmih bniah halor ka jingjia bad un phah iaka kaiphod shaka Sorkar Jylla.
.){kind=link}