Shillong, Jylliew 27: U Vice president ka Bharatiya Janata Party (BJP) Meghalaya u bah David Kharsati ula iathuh baka Party kan sa thung daka committee ka ban tohkit halor ka jingpra ka kynroh jong ka madan P.A Sangma Stadium kaba don ha Tura West Garo Hills tang namar ba jur u slap.
Haba kren sha ki lad pathai khubor u bah David ula ong ba iaka Committee yn thaw hi da u President ka Meghalaya BJP hadien ba ula wan phai sha Shillong bad kane ka Committee kan pynlong iaka jingtohkit kaba bniah halor ka jingtwa ka kynroh ka P.A Sangma Stadium.
“Ka Committee kan leit jurip iaka P.A Sangma Stadium bad kan pynlong iaka jingtohkit bad iaka kaiphod yn sa phah sha nongbah Delhi naka bynta ban ioh ka jingbthah, kumno ban iaid shakhmat halor kane ka kam” long u bah David.
U bah David ula ong kumba iohi mynta ka daw ka jingtwa ka kynroh ka lah ban dei namar ka jingtrei torti hynrei ia ka jingshisa yn sa tip hadien ka jingtohkit da ki Stad (Expert), balei kum kine ki jingtei ki twa noh tang namar ba jur u slap.
