Shillong, Jylliew 27: Ka seng Achik Conscious Holistically Integrated Krima (ACHIK) kala ai por 7 sngi iaka sorkar jylla ban pyntreikam iaka Roster System daka ba kyrtiang dien naduh ki snem bala leit noh lane Retrospective.
U President ka seng ACHIK u Thomas M Marak ula ong “Mynta ka sngi ngi la ai por iaka sorkar jylla ban pyntreikam iaka Reservation Roster daka ba kyrtiang dien naduh ki snem bala leit noh ha baroh ki tnat treikam sorkar, ki Public Sector Organizations bad ki shlem pule”
“Ngi kyrpad iaka sorkar ba hapoh 7 sngi kadei ban pyntreikam noh iaka Roster naduh ba sdang treikam ka Reservation Policy bad ban pynmih ia ka jingpyntip ha ryngkat bad ki lad lynti kumno ban pyntreikam iaka Roster katkum ka jingdawa ka seng” ula ong.
U Thomas ula ong ba lada ka sorkar jylla kam lah ban pynurlong katkum ka jingdawa ka seng, kan hap ban bah khlieh lada mih kane kano kano ka jingiakhih.
Haba pynpaw baka sorkar jylla kadei ban pynshisha iaka jingshah leh bein ki paid Garo naduh mynshwa, u Thomas ula ong ba ka jingdawa ban pyntreikam iaka Roster daka ba kyrtiang dien kam dei tang ka jingai jingmut hynrei kadei ruh ka hok katkum ka riti synshar ka ri India ba ka sorkar jylla kam lah ban iaid lait.
U Thomas ula ong ba kane ka jingai por kadei ruh ka jingkyrsiew thiah iaka sorkar jylla ba kan shim khia ia kane ka jingdawa daka ba burom iaka hok long briew man briew bad ban pynioh iaka hok jong baroh.
“Ka jingiai bteng ban pynduh iaka hok ki paidbah ba duna haka ioh ka kot jong ki jaitbynriew ka paw ruh baka sorkar ka niew bein iaki rit paid bad dei namar kane ki nong shong shnong ka Meghalaya kin nym shong kli kti ban dawa iala ka hok” ula ong.
Ula ong baka jingpyntreikam iaka Roster daka ba kyrtiang dien bad ka jingphai dien biang iaka Backlog Policy ka long kaba donkam bha bad ka sorkar kam dei ban iaid lait.
