Shillong Nailur 20: Hadien ka jingshah khanglad ki nongrep kiba dei ki jaidbynriew Pnar na ka shnong Lapangap ha ki kynhun jong ki jaidbynriew Karbi, u Symbud Myntri Rangbah ka jylla u Bah Sniawbhalang Dhar hynne ka sngi Saitjain ula pyntip ba ula iakren bad ki heh ophisar sorkar halor katei ka mat.
Ula pyntip ba ha ka 29 ne 30 tarik u Nailur yn sa lum ia ka jingialang na ka bynta ban thaw ia ka Peace Committee na baroh arliang.
U Bah Dhar ula ong, ba ka jingjia ha ka sngi Thohdieng ka long kaei kaei kaba sngewsih bad ula iakren bad u ADM jongka West Jaiñtia Hills uba khmih ia ka thain khappud ban ai shuh shuh ia ki jingtip halor katei ka jingjia.
Ha kaba iadei bad ka jingiakren ia u pud u sam, u Bah Dhar ula ong, ba kadei ka kam kaba iaid shakhmat bad kaban iai bteng bad mynta kaba kongsan tam ka long ban pynthikna ba ki nongrep kin ioh ban leit rep leit riang ha ki pynthor ki jongki.
Halor ka jingdawa ki nongshong shnong ban pynbun shuh shuh ia ki pulit ha ka thain, u Symbud Myntri Rangbah ka jylla ula iathuh ba u Waheh Chnong ula dep ban kyntu ia katei bad kumta un sa iakren ia kane ka kam bad u Chief Secretary ryngkat bad ka DGP.
