Shillong, Jymmang 05: U Chief Electoral Officer (CEO) ka Meghalaya, u BDR Tiwari hynne ka sngi Nyngkong, ula pynbna ba ka Election Commission of India (ECI) kala pynkhreh ban sdang pyntreikam noh ia ka ECINET, ka rynsan Digital kaban kynthup lang ia palat 40 tylli ki Electoral Applications.
Kane ka long da ka jingthmu ban don ka jingpyniaid ryntih bad ban pynsuk ia ka rukom treikam na ka bynta ki 100 klur ngut ki nongthep vote bad ia ki lak ngut ki ophisar ka elekshon kiba don ha kylleng jong ka ri.
U Tiwari ula pyntip ba kala don ka jingpyniaid shakhmat ha kaban khmih bniah (Testing) ban pynthikna ba kan don ka jingshngain bad ka jingtreikam kaba paka, hashwa ban sdang pyntreikam pura noh.
Haba kren halor ka jingpyniasoh ia u Aadhaar bad ka Electoral Photo Identity Card (EPIC), u Tiwari ula pynshai “Ba ka jingpyniasoh ia u Aadhaar bad ka EPIC kam pat dei satia kaba la long kongsan katkum ka hukum kaba la pynmih da ka Supreme Court. Hynrei namar ba u Aadhaar udei uba la pyniasoh bad kiba bun ki lad ai jingshakri, ngi lah kyntu ia ki nongthep vote ba kin pyniasoh ia ka EPIC bad u Aadhaar. Hynrei ia mynta hi, ka dang dei ka lad kaba lah ban jied(optional). Ia kane ka jingai jingshakri lah ban ioh na ki Electoral Registration Officer (ERO).”
U Tiwari ula kren ruh ha kaba iadei bad ki nongshong shnong kiba don palat ia kawei ka EPIC ha ka jylla. Ula phla ba kila don 524 ki jingjia kiba la dep ban ithuh ha ka jylla Meghalaya ha kaba ki riewshimet kila don ia kajuh ka EPIC ha kylleng ki jylla hynrei hapoh jong kawei ka kyrteng hi.
“Ia kine ki jingjia la dep ban pynbeit. Baroh 524 ngut ki riewshimet kila ioh da ki EPIC kiba thymmai. Kane kadei shi bynta jong ka rukom treikam kaba la sdang da ka ECI ban ithuh bad ban pynduh jait noh ia ka jingdon bun tylli ki EPIC. Ia baroh kitei ki EPIC lah dep ban sei bad lah dep ban aiti” ula ong.
Ka rynsan ECINET bad ka jingiaid shakhmat ban pynbeit ryntih ia ki nongthep vote ka pyni ia ka jingtrei shitrhem jong ka Election Commission ban pyniaid ia ki kam ki jam katkum kane ka juk stad bad ban pynthikna ba ka kam kaba iadei abd ka elekshon ha ka ri kan long kaba khuid ba suba bad kaba lah ban ioh da baroh.
