Shillong, Jymmang 06 : Khatduh ka jingapkhmih lynti bala slem bha ban pyntreikam ia ka Baljek Airport ha Ri-lum Garo kan sa urlong noh, da ka jingiasoi ka Sorkar Meghalaya ia ka soskular Operation and Maintenance (O&M) ia ka kad liengsuin bad ka Airport Authority of India (AAI).
Ka Tnad Meghalaya Transport kala iasoi ia ka Memorandum of Understanding (MoU) na ka bynta ka Operation and Maintenance (O&M) bad Communication, Navigation & Surveillance/Air Traffic Management (CNC/ATM) ia ka Kad bad ka AAI ha Baljek Airport, West Garo Hills.
Kane ka MoU kan pynlah ia ka AII ba kan pyniaid ia ka liengsuin ba 20 tylli ki jaka shong, kaba long ka jingsdang ia ka lad pyniasoh na suin na ka bynta ka Ri-lum Garo.
U Myntri Rangbah ka Jylla Conrad K Sangma, uba iadonlang ha ka jingialang iasoi soskular, ula iaroh ia kane ka kam bad ong b aka dei ka sienjam ba kongsan ban jam shakhmat. Ula kular ia ka jingkut jingmut jong ka Sorkar ban kyntiew kyrdan ia ka Kad liengsuin khnang ba yn lah ban wan hiar ki liengsuin kiba heh kum ka ATR-72.
Ula kren ruh ia ka jinglah jong ka Baljek Airport ban long kum ka jaka pynpoi ia ki mar ki mata na ka bynta ka thain haba buh hakhmat ia ka kabu ba ka dei kaba jan eh bad ki ri ba marjan. “
Kum shibynta jong ka soskular, ka AAI kan shimti ia ka Kad tang ia ka pyniaid bad sumar (Operation and Maintenance) ia ka liengsuin ba 20 tylli ki jaka shong bad ban pynsdang ia ka kam ha kaban pynioh ia ka licence ban pyntreikam ia ka Kad.
Shuwa kane, ka AAI kala aiti ia ka detailed project report (DPR) bala pynkhreh ha u snem 2010 bad 2017 bad haba pyn shong nongrim ia kane, ka Sorkar Jylla kala jied biang ia ka jaka sa 56.5 acre ban pynheh ia ka kad.
