Shillong, Lber 26 : Ka Sorkar Jylla kan sa shim ia ka rai ba khatduh ban khylliap noh/pynduh pyndam ia ka CMJ University hadien ka jingiakynduh u Myntri Rangbah Conrad K Sangma ia u Lat ka Jylla CH Vijayashankar halor kane ka kam.
Haba pyntip ia kane ha ka sngi Balang, u Myntri bad Nongaiktien ka Sorkar Bah Paul Lyngdoh ula ong ba kane ka kam kala mih ha ka jingiakren ha ka jingialang jong ka Kynhun Myntri ba long hynne ka sngi.
“Ha ka jingshisha, ka jingiakren kala long kaba sngewtynnad bha bad kaei kaba sah mynta ka long naba ki dang don ki kam kiba u Lat ka Jylla ruh u don bynta lang ban shim rai, kumta ka Kynhun Myntri kala aibor ha u Myntri Rangbah ba un batai ia u Lat bad hadien ba dep kane, un sa rah iakren biang ha ka kynhun Myntri” ula ong.
“Ka jingiakren ba hynne ka sngi kan sa long biang ha ka jingialang ba nyngkong jong ka Kynhun Myntri ka ban long ha u bnai Iaiong” ong u Myntri.
