Shillong, Nailur 20 : Ka Assam Don Bosco University da ka jingiatreilang bad ka Genesis Max Foundation kan pynlong ia ka lympung ialehkai kaba nyngkong eh ha ki 20 tylli ki nongbah jong ki jylla ka thain shatei lam mihngi ka Ri kaban tip kum ka North East Pride Cup.
Haba pynbna ia kane u CEO ka Genesis Max Foundation u Abhijeet Oberoi u la iathuh ba ha Meghalaya ki la jied haduh san tylli ki jaka ban pynlong ia kitei ki jingiakhun kata ha ka rta kaba 14, 16 bad 19 snem.
Kitei ki jaka ki kynthup ia ka Shillong kaban long ha ka 24 bad 25 tarik mynta u bnai ha Assam Rifles Football Ground, Laitkroh katba kiwei pat ki jaka ki kynthup ia ka Mairang, Nongstoin, Tura bad ruh ha Jowai.
La pynbna ruh ba ka jingpynialehkai kan long ha ka dur jong ka 5-aside kaba mut ialehkai tang mar san ngut shilliang bad lai ngut pat kiban shong pynap ne substitute.
Ki nongjop na man la ki nongbah kin sa shah jied pat ban leit knieh ia ka nam lahduh ha ka lympung kaba kham heh kaban long ha nongbah Guwahati ban knieh ia ka khusnam kaba 3 lak tyngka.
