Shillong, K’lyngkot 27 : Ka Jylla Meghalaya kala shim ia ki sienjam ban tehlakam ia ka jingwan rung tuh ki mynder ri, da ka jingthmu ban pynkhie im biang ia ki Village Defence Party (VDP) ha ki shnong khappud bad ka Bangladesh.
Haba pynbna ia kane ha ka sngi Ba-r, u Symbud Myntri Rangbah ba khmih iaki kam Pohiing Bah Prestone Tynsong ula ong “Lada phi iakren ia ka jingrung tuh ki mynder ri, kane ka dei ka sobjek jong ka Sorkar Pdeng bad kam dei ka sobjek ka Jylla hynrei ngan iathuh ha phi kawei ba namar ka jinglong jingman ba mynta ha Bangladesh, ngi la rai kum ka Sorkar Jylla ba ngin pynkhie im biang ia ka jingtreikam jong ki VDP ha ki shnong khappud ka Bangladesh bad ki Jylla ba marjan”.
Haba kylli la ka Sorkar ka don jingthmu ban ai tiar siat sha ki VDP, u Bah Prestone ula ong “Ym dei eh ka tiar siat hynrei ngin ai sha ki ia ki jinghikai pyntbit. Ngi don ia ki jingai jinghiai bad ngin sa peit ruh kiei ki jingdonkam ba donkam hakhmat eh. Ngin sa ai jinghikai shuh shuh ia ki VDP khnang ba kin lah ban iakhun pyrshah ia ka jingrung tuh ki mynder ri”.
U Symbud Myntri Rangbah ula pyntip ruh ba ka Jylla kala shim ia ki sienjam ban leh eiei pyrshah ia ki mynder ri ba rung tuh kat kum ki ain kiba la don lypa.
Ula kular ruh ia ka jingshngain ki jaka khappud bad ong “Ia mynta, ngi long kiba shngain. Ryngkat lang, ki BSF bad ki Pulit ka Jylla kila peitngor bha bad la bthah ia ki bor District ba kin shim ia ki sienjam ba donkam haba ki iohpdiang ia kino kino ki khubor”.
Halor ki sienjam ban husiar namar ka elekshon ha Bangladesh, u Bah Prestone ula ong “Ngi la shim ia ki lad jingiada kam pher la ka don elekshon ne em”.
 ha ki shnong khappud bad ka Bangladesh.){kind=link}