Shillong, Naitung 24 : U Myntri Rangbah ka jylla Conrad K Sangma ha ka 26 tarik mynta u bnai un sa pdiang sngewbha ia ka jingwan pyniasoh jong u nongialam ka Congress bad MLA barim ka Mawphlang, Bah Kennedy Khyriem sha ka National Peoples Party (NPP).
Kane ka jingpdiang ia ka jingwan iasoh une u MLA kan long ha Mawphlang ha ka jingiadon ryngkat u Symbud Myntri Rangbah ka Jylla Bah Prestone Tynsong, ki Myntri Sorkar, ki MLA bad ki MDC kiba dei jong ka NPP.
Kane ka jinghiar jong ki nongialam ka NPP khamtam eh u National President ka long ruh artad kum ka sienjam ban pynkhreh ia ka elekshon MLA na kane ka constituency.
Watla haduh mynta na ka liang ka NPP kam pat pynbna hynrei ki tyllong khubor ki iathuh ruh ba ha katei ka sngi, ki nongialam ba rangbah ka party ki lah ruh wat ban pynbna syndon ia ka kyrteng jong u Bah Kennedy kum u kyrtong ka party.
Ka kyrwoh na u Publicity Secretary ka NPP Mawphlang, Bah Garland Kharnaior la iathuh ba katei ka jingïalang pdiang burom kan long ha Madan Shad Mawphlang ha ka por 11baje mynstep.
