Shillong, Naitung 24: Ka National Health Mission (NHM), la kynnoh ba kala pynlut ia palat T. 500 klur ka pisa ha ka jing iakhun pyrshah ia ka khlam Covid-19 ba wan lynshop ia ka Jylla naduh u snem 2020-2021.
Kane ka jingkynnoh kala mih na ki Ophisar jong ka Tnad ka Koit ka Khiah (ki bym kwah pynpaw kyrteng), kiba la la buh jingkylli ba kumno ka NHM ka lah ban pynlut haduh katne ka pisa bad kumno ruh ka ioh ban pyniaid ia ka jinglut jingsep ha ka jingiakhun ia ka khlam Covid-19.
Kat kum ka jingong jong ki, ka tnad NHM ka dei kaba pyniaid da u Mission Director (MD) bad ka dei kaba khmih bad pyntyllun ia ki prokram bapher bapher jong ka Sorkar Pdeng kiba iadei bad ka jingpynkhlain ia ki jaka ai jingsumar, ban pynlong ia ki jingialap paidbah ia ki jingpang bapher bapher bad kiwei kiwei.
Ka Sorkar Meghalaya Democratic Alliance (MDA) ha ka Dorbar Mang tyngka ba long ha u bnai Lber 2022, ka la pyntip baka Sorkar kala pynlut haduh T.650 klur ban iakhun ia ka khlam jong u snem 2020-2021 bad 2021-2022.
U Myntri ula pyntip ia kane haba jubab ia ka jingkylla bala wanrah da u MLA ka Mawlai Bah PT Sawkmie haba pyntip ba ka Ophis jong ka National Health Mission (NHM) kala pynlut tang T. 85 klur ha kane ka jingiakhun ia ka khlam.
Ki Ophisar kila kynnoh ba jingpynlut pynsep jong ka National Health Mission (NHM) ia ka pisa ba T.550 klur kat haduh mynta kam long shai satia bad kaba ikop don aiu re aiu ha lyndet, kaba dei ban tohkit bad wad bniah.
Kat kum ka jingiathuh jong ki, ka Tnad ka Koit ka Khiah ka dap da ka jinglyngngoh bad jingkyndit ban tip ba ka pisa ba ka Tnad ka dei ban ioh lum na ka jingpynlong ia ki covid test kum ka RAT, RT-PCR ha ki screening centre bad kylleng ki jaka jong ka Jylla nalor ka jingai injek tika, kala poi lut sha ka NHM ym sha ka pla iarong ka Sorkar Jylla.
“Ka pisa bala iohlum na ka jingpyniaid ia ki test bad ka jingai injek tika kam shym la poi sha ka pla tyngka ka Jylla, kaba dei ka jingioh lum pisa (revenue) ka Jylla hynrei ka leit lut sha ka NHM. Ngim ioh jingkhein ruh ba haduh katno ka Jylla kala ioh lum na kine ki kam bad kumno ruh la pynlut ia kane ka pisa” kila buh jingkylli.
Kat kum ka jingiathuh jong ki, ka jingpynlut jong ka NHM ka long kaba bun eh sha ka jingpynbiang ia ki jingbam ha ki Corona Care Centre, ia ki briew ba shah set slung, ka jingpynbiang jaka sah ia ki Nongtrei ka koit ka khiah bad kiwei kiwei.
“Ki dang don bun ngut ki briew ba iarap ia ka NHM ban pynbiang bam, pynbiang kali, pynbiang jaka sah ia ki Nongtrei ka Koit ka Khiah, ki bym pat ioh satia ia ka bill haduh mynta” kila kynnoh.
Kine ki Ophisar kila ong ba ka jingtohkit ka dei ban don halor ka rukom pynlut pynsep jong ka NHM ha ka jing iakhun ia ka khlam Covid-19.
