Shillong, Nailur 15: Ka Khasi Hills Autonomous District Council (KHADC) kala rai ban khot da ka jingialang bad ki Majistor, ki Nongiasaid ain bad ki Khlieh Nongsynshar ban iatai bniah ia ka Notification ka sorkar ban pyntreikam ia ka CrPC bad CPC ha ka Jylla hashuwa ban shim ia ka rai ba khatduh.
“Ngin lum da ka jingialang bad ki Majistor, ki Nongiasaid Ain jong ka Iingkashari District Council lem bad ki Khlieh Nongsynshar ban iatai bniah halor ka notification ka Sorkar Jylla” ong u Chief Executive Member (CEM) ka KHADC Bah Titosstarwell Chyne haba pyntip ba ia kane ka jingialang yn sa pynlong ha ka 21 tarik mynta u bnai.
Ia kane ka rai la shim ha ka jingialang jong ka Council ba long hynne ka sngi-kaba iashong pyrkhat halor ka jingmih na ka jingleit iakynduh jong u CEM bad u Myntri Rangbah ka Jylla hynnin ka sngi Balang.
“Ngi lah sngewthuh ia ka jingthmu jong ka sorkar jylla bad ngi ruh ngi don ia kajuh hi ka rukom pyrkhat namar ka sorkar kala dep ban pynshai mynin ka sngi, ba ka CrPC bad CPC kan ym ktah eiei ia ki District Council Court, Subordinate Court ne ki Additional Subordinate Court bad wat iaki kam Mukotduma hapdeng ki trai muluk yn bishar beit hapoh ki District Council Court” ong u CEM
“Namar kata, ngi la rai ba ngin lum ia ka jingialang ha ka 21 tarik mynta u bnai bad ki District Council Court, ki Majistor, ki khlieh nongsynshar, ki nongiasaid aiñ jong ki Hima bad ia ki nongiasaid aiñ jong ka sorkar ba kin ai shuh shuh iaka jingpynshai” la ong u CEM.
“Watla ngi la ioh ia ka jingpynshai na ka Sorkar Jylla hynrei ngim kwah ban shim ia kano kano ka rai kaba kyrkieh. Kumta ngin lum shuwa ia katei ka jingialang hashuwa ban shim ia ka rai” ula bynrap.
Halor ka jingpynpaw u Myntri Rangbah ba ka Notification kan ym ktah ia ka bor jong ki Iingkashari District Council namar ka dei kaba la pynkupbor da ka Riti Synshar ka Ri, u CEM ula ong “Lada jia ba kane ka Notification ka ktah hadien habud, ngi lah ban iakhun pyrshah ha ka Iingkashari”.
