Shillong, Nailar 27: Ka samla Angelia N. Marweiñ (24 snem) kaba la pyndep ia ka jingpule Political Science na Shillong, ka la shah jied ban mihkhmat ia ka Meghalaya ha ka jingiakop thei bhabriew ‘Femina Miss India 2024’.
Lah ban kdew ba ka jingiakop thei bhabriew ‘Femina Miss India 2024’ ka dei kaba la pynlong ha ka sien kaba 60 bad ki nongïashim bynta kin dei na baroh 29 tylli ki Jylla bad ki Union Territories ka Ri India.
Ka samla Angelia, kaba dang pule Post Graduation, haba pynbiang tarajur ia ka kam Modelling, ka wanrah ïa ka jingïohi kaba kyrpang ha kane ka jingïakob. Ka jingdon bynta jong ka ha ka kam imlang sahlang, khamtam eh ka jingïadon bynta jong ka bad ka EARMACS, ban kyntiew ïa ki mar rep ba mih na ki jaka nongkyndong bad ka roi ka par, ka pynpaw ïa ka jingaiti jong ka ha ka jingshakri ïa ka imlang sahlang.
Haba ïakren bad ki lad pathai khubor, ka samla Angelia ka la ong, “Nga sngew burom haduh katta katta ban mihkhmat ïa ka Meghalaya ha ka jingïakob Femina Miss India 2024 ka ban sa long shen.”
“Kane ka dei ka jingangnud kaba la urlong na ka bynta jong nga, bad ka long ka jingkyrkhu ban ioh ia ka lad ban pyni ym tang ia ka jingleit jingwan shimet jong nga, hynrei ruh ia ka kolshor bad ka pateng kaba riewspah jong ka Jylla jong nga ha kum kane ka rynsan kaba heh” ka la ong.
Ka Angelia ka dei kaba mih na ka imlang sahlang Khasi (Meghalaya) kaba ngeit bad burom iaka jinglong kypang jong ki kynthei bad ka jingïaryngkat hapdeng u shynrang bad ka kynthei.
Haba kylli shaphang ka jingpynkhreh jong ka, ka samla Angelia ka la ong “Kum ka riew thymmai ha kane ka rynsan ka la pynshlur ïa nga ban trei shitom. Nga pynleit jingmut ha man la ki bynta jong ka jingpynkhreh, la ka long ka jingsaindur, ka met ka phad kaba dait riam, ne ka jingsngewthuh ïa ka jingmut ba kumno ka mut ban long ka Miss India.”
Ki jingsngewtynnad jong ka samla Angielia, ki kynthup ha ka jingrwai, ka shad bad ka jingïalehkai.
Ha kaba ïadei bad ki jingangnud jong ka na ka bynta kane ka rynsan, ka Angelia ka la pynpaw, “Nga thmu ban pyndonkam ïa kane ka kabu ban khring ia ki jingmut jingpyrkhat sha ki mat kiba kongsan, khamtam kito kiba ktah ïa ka imlang sahlang jong ka jaidbynriew jong nga ha Meghalaya, kum ka pule puthi, ka jingpynkupbor ïa ki kynthei, bad ka jingpynneh pynsah ïa ka kolshor.”
Ka lahduh jong ka Femina Miss India 2024 kan mihkhmat ia ka Ri India ha ka jingiakop Miss World kaba 73 sien.
Iaka pangsniat, Miss India 2024, yn pynkup daka Miss India ba mynta ka sngi, ka Nandini Gupta na Rajasthan.
