Shillong, Lber 02: Ka Myntri ka koit ka Khiah ka jylla ka Kong Ampareen Lyngdoh ha ka sngi Thohdieng, kala pyntip ba ka Sorkar Jylla ka don ia ka jingthmu ban tyrwa ia ka Sorkar Pdeng ban bhah shuh shuh ia ka Medical Seat na ka bynta ki samla pule jong ka jylla Meghalaya.
Ka Myntri kala ong, ba kum ka sorkar lada ki bei tyngka halor katei, kumta bun ngut ki Doctor kin wanphai biang bad kin don bun noh bad kala pyntip ba ha ka jingbhah ia ka MBBS Seat kaba la dep, ka long kumba 96 ngut bad iwei pa iwei i samla pule, kila la leit pule lyngba ka jingshah bei tyngka khlem da donkam ban pynlut nalade.
Kala ong, ba ka jingsiew kaba hap ban siew ha kitei ki Seat kiba thylli kiba la mang na ka bynta ka jylla Meghalaya da ka Sorkar Pdeng kadei tang ia ka jingai ia ka Scholarship.
“Ar ngut ki samla pule kiba la aplai ia ka Scholarship. Kala don ka jingpynslem ha kaban pyllait ia ka Scholarship jong ki samla pule MBBS, ia kaba nga la ioh ia ka jingbatai bad ioh ia ki jingtip ba lah dep ban pyllait. Ngi la phah bun ngut ki samla pule, ka jingbhah ia ki Seat pule ka kylla na uwei u snem sha uwei pat bad kan shong katkum ka jingdon jong ki seat ha ki jaka pule kiba la mang da ka Sorkar Pdeng” la pynshai ka Kong Ampareen.
Ha kaba iadei bad ka jingwan phai ki MBBS Doctor sha ka jylla, ka Myntri ka Koit ka Khiah kala ong, ba kila pyrshang katba lah ban don ia ki jingtip kiba bniah halor ka jingwan phai jong ki MBBS doctor sha ka jylla hadien ba kila pyndep ia ka jingpule ka jongki.
“Ngam don ia kitei ki nombar bad nga ia mynta, hynrei ka tnad sorkar la kumno kumno ruh, kan don beit ia ki jingtip haei ki don kitei ki Doctor. Kiba bun na kitei ki Doctor kin hap ban ialeh iaka eksam NEET na ka bynta ka PG,” ong ka Kong Ampareen.
Kala pyntip ba ha ki snem kiba la dep, la pynkiew ia ka Bond ne ka jingiasoi soskular bad ka jingiasoi ia ka Bond kadei kaba la pynbeit thymmai na ka por sha ka por bad ka long kaba teh kyndon ia ki samla pule ban pyntip sha ka sorkar la kin wanphai ne kin ym wanphai.
Kala ong ba mynshwa kam don satia ka Board ne ka Registry hynrei mynta shisien ba kisamla pule kila pyndep ia ka MBBS kin hap ban ai ia ki jingtip.
“Kato katne ki Doctor jong ngi kila rejister ha kiwei pat ki jylla, mynta ngi lah don ia la ka jong ka Medical Board kaba rejister bad mynta ngi la pynlong ia kane kum kaba kongsan bha. Ngi hap ban iathuh ia ki Doctor ba kidei ban wan bad ban rejistar ha ka Board jong ka jylla jong ngi,” ong ka Kong Ampareen.
