Guwahati, Nailar 25 :Ka sorkar Assam kala shim ia ka rai ban khang khyrdep noh ia ki 34 tylli ki skul ba la pyniaid da ka sorkar hadien ba ym shym la don iwei ruh napdeng kine ki skul kiba pass ha ka High School Leaving Certificates (HSLC) lane Class X board exam mynta u snem.
Haba kren halor kane ka phang, u Myntri ka tnat ka koit ka khiah ka jylla, u Ranoj Pegu ula ong ba kam don jingmut ban pynlut kai ia ka pisa jong ki nongsiew khajna ha ki skul kiba ym shym la don ba pass wat tang iwei ruh.
“Ka kamram kaba kongsan tam jong ki skul ka long ban sam ia ka jingnang jingstad. Lada ka skul kam lah ban pynthikna ba ki khynnah pule jong ka kin pass ia ka eksam klas X, kam don jingmut ban dang pynneh ia kine ki skul,” ong ka lad pathai khubor kaba la shim ia ka jingkren jong utei u myntri.
“Na ka liang ka sorkar kam lah ban pynlut kai ia ka pisa paidbah ha ki skul kiba ym don wat tang iwei ruh i khynnah ki ban pass,” ong shuh shuh u Pegu.
Katkum ki khubor la ong ba hynniew tylli na kine ki skul ki dei napoh Karbi Anglong district, mar san napoh Jorhat bad Cachar, 2 na Dhubri, Goalpara, Lakhimpur bad Nagaon, bad mar iwei na Golaghat, Kamrup, Kokrajhar, Nalbari, Hailakandi, West Karbi Anglong Chirang, Darrang, bad Dibrugarh district.
Hynrei, watla katta kane ka jingshim rai jong ka sorkar Assam kala wanrah ka jingpyrshah jur na ka Aam Aadmi Party (AAP). “Ka jingkhang ia ki skul kam dei ka lynti kaban lah ban weng ia ki jingeh. Ngi donkam ban plie shibun ki skul kiba thymmai ha baroh kawei ka ri. Ha ka jaka ban khang khyrdep ia ki skul, pynbha ia ki bad kyntiew ia ka pule puthi,” ong u Myntri Rangbah (CM) ka Delhi, u Arvind Kejriwal lyngba ka twitter.
Ha u bnai Jylliew ba la dep, ka Assam Secondary Education Department kala pan jingpynshai na ki 102 tylli ki skul ba la pyniaid da ka sorkar jylla namar ka jingbym lah ban lehbha ha ka eksam High School Leaving Certificate (HSLC).
Katkum ka percentage halor ka jingdon jong kiba pass ha ka eksam HSLC ka long da 56.49 per percent mynta u snem bad ka la hiar shibun haba ia nujor bad ka snem 2021, hadien ba ka jingpass jong ki khynnah ka long haduh 93.10 percent, kata ha ka por ba ym shym la pynlong ia ka eksamin namar ka jingsaphriang jong ka jingpang Covid-19.
Lah ban kdew ba ia ka result jong ka snem 2021 la pynbna lyngba ka jinglah jong ki khynnah hapoh ki klas pule ki jong ki. Katkum ka tnat pule puthi, haduh 25 tylli ki skul sorkar ha ka jylla kim shym la lah ban lehbha, kaba pyni ba ka jingpass kalong 0 percent ha ka eksam HSLC/AMH mynta u snem.
Ha kawei pat ka liang haba shim katkum ka percentage, ka jingpass jong ki khynnah ha ki 70 tylli ki skul kala hiar hapoh ka10 percent bad ka jingpass ha ki 7 tylli ki skul kalong tang 10 percent.
“Napdeng ki 102 tylli ki skul, 25 na ki, kila pyni ia ka jingpass kaba 0 percent. Ngi la phah da ka jingthoh ban pan jingshai na ki principal/headmaster jong kine ki 102 tylli ki skul. Ngi la kyntu ia ki ba kin ai jubab lyngba ka jingthoh hapoh ka hynniew sngi naduh ka sngi ba kila ioh pdiang ia ka shithi,” ong ka Director ka Secondary Education, ka Mamata Hojai.
